चुरे तथा वन जंगल संरक्षणका लागि आह्वान गर्दै काठमाडौं आएको चुरे तथा वन जंगल संरक्षण अभियानको टोलीले शनिवार काठमाडौंको माइतीघर मण्डलादेखि बानेश्वरसम्म र्याली निकालेको छ । टोलीमा २३ दिनसम्म पैदल हिँडेर सप्तरीदेखि काठमाडौं आइपुगेका २२ जना छन् । चुरे तथा वन जंगल संरक्षणका लागि सरकारको ध्यानाकर्षण गराउँदै उनीहरुले भारदहदेखि चितवन हुँदै काठमाडौंसम्म पैदलयात्रा गरेका थिए ।
नेपाल पत्रकार महासंघको निर्वाचन तोकिएकै समयमा सम्पन्न गर्न विभिन्न छ संगठनले माग गरेका छन् । महासंघको जेठ २६ गते तोकिएको निर्वाचनको मिति नजिकिँदै जाँदा सदस्यता र नामावली टुंगो लगाएर सावर्जनिक गर्न ढिलाइ गरिएको भन्दै प्रेस चौतारी नेपाल, प्रेस सेन्टर नेपाल, समाजवादी प्रेस संगठन नेपाल, प्रगतिशील पत्रकार संघ नेपाल, जनपत्रकार संगठन नेपाल र क्रान्तिकारी प्रेस संगठनले शनिबार संयुक्त विज्ञप्ति जारी गरी यस्तो माग गरेका हुन् ।