दीपेन्द्र बडुवाल

उपप्रधान तथा गृहमन्त्री रवि लामिछानेले सहकारीको बचत हिनामिनामा आफू संलग्न नरहेको भन्दै महान्यायाधिवक्ताको कार्यालयबाट पत्र लिए पनि रूपन्देही जिल्ला अदालतमा प्रस्तुत प्रहरी प्रतिवेदनमा भने उनले ‘बिनाधितो, बिनाप्रक्रिया ऋण लिएको’ उल्लेख छ । अनुसन्धान प्रतिवेदनका विभिन्न सात पृष्ठमा नौ ठाउँमा नाम भए पनि उनलाई अभियुक्त बनाइएको छैन ।

जिल्ला अदालत रुपन्देहीले चोरी मुद्दामा दोषी ठहर गर्दै फैसलामा जरिवाना सुनाइएका एक प्रतिवादी ३५ वर्षपछि पक्राउ परेका छन् । इलाका प्रहरी कार्यालय रुद्रपुरबाट खटिएको टोलीले रुपन्देहीको कञ्चन गाउँपालिका–४ का गोपाल रानामगरलाई ३५ वर्षपछि आइतबार पक्राउ गरेको जिल्ला प्रहरी प्रमुख एसपी रन्जितसिंह राठौरले जानकारी दिए ।

बुटवल चौराहास्थित राजमार्गमा सार्वजनिक शौचालय सफा गर्ने सीता दर्जी । पूर्वपश्चिम गर्ने बसका यात्रुलाई फलफूल बेच्ने पीताम्बर भट्टराई । बिहानैदेखि चिया बेच्ने विष्णु पाण्डे । पात्र यी हुन् जसले आफ्ना सारा रहर खुम्च्याएर सन्तानको भविष्यका लागि बुटवलस्थित सुप्रिम सहकारीमा बचत जम्मा गरिरहेका थिए । तर उनीहरूको पसिनाको कमाइ तानेर गोर्खा मिडिया नेटवर्क सञ्चालन गरिएको थियो । अब निजी कम्पनीमा सारिएको पैसा कसरी फिर्ता हुने हो ? प्रश्न अनुत्तरित हुँदा करिब १० हजार बचतकर्ता अत्तालिएका छन् । 

जिल्लाका विभिन्न स्थानबाट प्रहरीले भन्सार छलेर भित्र्याइएका खाद्यान्न तथा घरायसी उपयोगका सामान बरामद गरेको छ । जिल्ला प्रहरीले विभिन्न स्थानमा गरेको जाँचका क्रममा भन्सार छलेर भित्र्याइएका १४ लाख ३६ हजार ७० रुपैयाँ बराबरका सामान बरामद गरेको र आवश्यक कारबाहीका लागि भन्सार कार्यालय बुझाइएको जनाएको छ । 

बर्दियालगायत तराईका राष्ट्रिय निकुञ्ज र संरक्षित क्षेत्रमा समस्याग्रस्त बाघ थपिने क्रम बर्सेनि बढ्दो छ । विभिन्न कारणले जंगलमा अस्तित्व रक्षा गर्न नसकेर विस्थापित भएका बाघद्वारा बस्ती पसेर बस्तुभाउ तथा मानिसको सिकार गर्नेक्रम बढेको छ । यसरी बस्तीमा आउने बाघलाई निकुञ्ज कार्यालयले उद्धार गरेर व्यवस्थापन केन्द्रमा राख्ने गरेको छ ।

विभिन्न कारण बजारमा शिथिलता देखिएपछि निराश रुपन्देहीका उद्योगी–व्यवसायीलाई उत्साहित तुल्याउन बिक्री बढाउने उपायबारे प्रशिक्षण प्रदान गरिएको छ । बजारमा देखिएको आर्थिक मन्दिका कारण उत्पादनको बिक्री घटेपछि जिल्लाका लगानीकर्ता निराश छन् । यस्तोबेला बिक्री बढाउने नयाँ अभ्यासबारे बहस गरिएको हो । 

रुपन्देहीका सीमावर्ती पालिकामा दिनदिनै आगजनीका घटना हुन थालेपछि सावधानीका लागि जनचेतना फैलाउन सशस्त्र प्रहरीले शनिवार लुम्बिनीमा आगलागी सम्बन्धी कृत्रिम घटना अभ्यास गरेको छ ।

बुटवलस्थित सुप्रिम बचत तथा ऋण सहकारीको बचत रकम अपचलन आरोपित ६ जनालाई जिल्ला अदालतले शुक्रबार धरौटीमा रिहा गर्न आदेश गरेको छ । शुक्रबार मध्याह्न थुनछेक बहस सकिएपछि जिल्ला न्यायाधीश डा. श्रीप्रकाश उप्रेतीको इजलासले सहकारीका अध्यक्ष ओमप्रकाश गुरुङलाई पुर्पक्षका लागि थुनामा राख्न आदेश गरेको  छ भने पूर्वपदाधिकारीसमेत रहेका दीपेश पुनलाई भने चार लाख रुपैयाँ धरौटी बुझाएर रिहा गर्न आदेश भएको छ ।

बुटवलस्थित सुप्रिम सहकारीको बचत अपचलनमा अभियुक्त बनाइएका दीपेशकुमार पुनले पनि आफूले सहकारीबाट कुनै रकम नलिएको र कसैले आफ्नो नाम दुरुपयोग गरेको भए जिम्मेवार नहुने बयान दिएका छन् । सहकारीबाट १४ करोड ल्याउने गोर्खा मिडिया नेटवर्क प्रालिका तत्कालीन प्रबन्धन निर्देशक तथा गृहमन्त्री रवि लामिछानेले पनि सार्वजनिक रूपमा यस्तै प्रतिक्रिया दिँदै आएका छन् ।

बुटवलस्थित सुप्रिम सहकारीका बचतकर्ताहरूले सहकारीको बचत अपचलनमा उपप्रधान तथा गृहमन्त्री रवि लामिछानेमाथि छानबिन गर्न र उनका व्यापारिक साझेदार तथा सहकारी ठगीका मुख्य नाइके गितेन्द्रबाबु (जीबी) राईलाई पक्राउ गर्न माग गर्दै प्रदर्शन गरेका छन् । सुप्रिम सहकारीमा भएको ठगीमा अनुसन्धान गरेको प्रहरीले राई र लामिछानेसहितले ‘प्रक्रिया पूरा नगरी’ करिब १४ करोड गोर्खा मिडियामा सारेको किटान गरे पनि प्रतिवादीको सूचीबाट लामिछानेको नाम हटाएपछि बचतकर्ताहरू प्रदर्शनमा उत्रिएका हुन् ।