भैरहवा — मुलुकमा पहिलोपटक दुई पाङ्ग्रे सवारी चालकले प्रयोग गर्ने हेल्मेट सफाइ गर्ने मेसिन भित्र्याइएको छ । गैरे फ्रेसपोड नेपालले बिहीबार दिउँसो बुटवलमा कार्यक्रम आयोजना गरेर हेल्मेट क्लिनिङ तथा स्यानिटाइजिङ मेसिन सार्वजनिक गरेको हो । 

गैरे प्रतिष्ठानका अध्यक्ष प्रेमराज गैरे र नाडा अटोमोबाइल एसोसिएसन नेपालका सचिव मेघराज पौडेलले संयुक्त रूपमा मेसिन सार्वजनिक गरेका हुन् । 

भारतको प्रतिष्ठित कम्पनी फ्रेसपोड इन्डियाले उत्पादन गरेको मेसिनको नेपालका लागि आधिकारिक वितरक गैरे फ्रेसपोड प्रालि रहेको छ । बुटवल–१९ कालिका नगरस्थित गैरे फ्रेसपोड प्रालिले बिहीबारबाट विशेष छुटसहित मेसिन बिक्री थालेको छ । हेल्मेट सफाइ गर्ने मेसिनको नेपालमा करिब ६ लाख रुपैयाँ मूल्य रहेको छ । मेसिनले पाँच मिनेटभित्र हेल्मेट सफा गरिसक्छ । त्यसका लागि क्यूआरबाट पैसा तिर्ने व्यवस्था मिलाइएको छ ।

एकपटकको १ सय ७५ रुपैयाँ भुक्तानी गरेपछि मेसिनको ढोका आफैं खुल्छ । लगत्तै मेसिनमा राखेको हेल्मेट पाँच मिनेटभित्र किटाणुरहित र सफा हुने कम्पनीको दाबी छ । नियमित हेल्मेट सरसफाइले छालासम्बन्धी समस्या तथा संक्रमणको जोखिम कम गर्न सहयोग पुग्ने विश्वास पनि गैरे फ्रेसपोडले व्यक्त गरेको छ ।

प्रतिष्ठानका अध्यक्ष गैरेका अनुसार लामो समय हेल्मेट प्रयोग गर्दा पसिना, धूलो, ब्याक्टेरिया र दुर्गन्ध जम्ने समस्याको समाधानका लागि यो प्रविधि नेपालमा भित्र्याइएको हो । मेसिनमा अनलाइन क्यूआर भुक्तानी प्रणालीसमेत जडान गरिएको उनले जानकारी दिए । नगद बोक्नुपर्ने झन्झटबिनै ग्राहकले डिजिटल माध्यमबाट सहज रूपमा सेवा शुल्क भुक्तानी गर्न सक्ने उनको भनाइ छ । 

भारतमा सन् २०२५ मे ४ मा आन्ध्र प्रदेशका मुख्यमन्त्री चन्ऽबाबु नायडुले उक्त मेसिनको औपचारिक उद्घाटन गरेका थिए । छोटो समयमै भारत, श्रीलंका तथा अफ्रिकालगायतका देशमा विस्तार भएको फ्रेसपोडले अहिलेसम्म २ सयभन्दा बढी मेसिन बिक्री गरेर ५ लाखभन्दा बढी हेल्मेट स्यानिटाइज गरिसकेको कम्पनीले जनाएको छ ।