अस्ट्रेलिया र न्युजिल्यान्डबीच सोमबारदेखि हवाई उडान सुरु भएको छ । एक वर्षभन्दा लामो समयपछि सुरु भएको हवाई उडानमार्फत यात्रा गर्नेहरू क्वारेन्टाइनमा भने बस्न पर्ने छैन ।
कोरोना महामारीका कारण बेलायतका प्रधानमन्त्री बोरिस जोनन्सनको आगामी साता हुन गइरहेको भारत भ्रमण रद्द भएको छ । जोनन्सनले आगामी २५ अप्रिलदेखि भारत भ्रमण गर्ने तय भएको थियो ।
कोरोना संक्रमण फैलने क्रम तीव्र बनेपछि भारतको राजधानी दिल्लीमा एक साताका लागि लकडाउन गरिएको छ । राति १० बजेदेखि सुरु हुने लकडाउन आगामी सोमबार बिहान ५ बजे सम्मका लागि हुनेछ ।
भारतमा कोरोना संक्रमण दिनदिनै तीव्र गतिमा बढिरहेको छ । भारतीय स्वास्थ्य तथा परिवार कल्याण मन्त्रालयका अनुसार पछिल्लो २४ घण्टामा मात्रै २ लाख ७३ हजार ८ सय १० जनामा कोरोना संक्रमण पुष्टि भएको छ ।
रुसी विपक्षी नेता एलेक्सी नाभाल्नीको स्वास्थ्य अवस्था चिन्ताजनक रहेको उनको उपचारमा संलग्न चिकित्सकहरूले जनाएका छन् । नाभाल्नी हाल रुसी राजधानी मस्कोबाट ९० किलोमिटर टाढाको कारागारमा छन् ।
भारतको पश्चिम बंगाल विधानसभाअन्तर्गत शनिबार पाँचौं चरणको चुनाव सकिएको छ । चुनावमा करिब ७९ प्रतिशत मत खसेको भारतीय सञ्चारमाध्यमले जनाएका छन् । ६ जिल्लाका ४५ सिटका लागि शनिबार भएको चुनावमा ३ सय १९ जना प्रतिस्पर्धी छन् ।
