इरानको समृद्ध युरेनियम भण्डारतर्फ संकेत गर्दै ट्रम्पले उपयुक्त समयमा, स्थिति शान्त भएपछि, अमेरिकाले नष्ट गर्ने प्रक्रिया अघि बढाउने बताए।
What you should know
काठमाडौँ — अमेरिकी राष्ट्रपति डोनाल्ड ट्रम्पले अमेरिका र इरानबीचको द्वन्द्व अन्त्य गर्ने सम्झौतामा आज औपचारिक हस्ताक्षर हुने तालिका रहेको बताएका छन्। उनको यो वक्तव्य इरानले उक्त समयतालिकाप्रति शंका व्यक्त गरेको केही समयपछि आएको हो।
ट्रम्पले आफ्नो सामाजिक सञ्जालमार्फत् सम्झौतामा सहमति जुटेपछि अन्तर्राष्ट्रिय व्यापारको प्रमुख मार्ग मानिने हर्मुज जलमार्ग ‘सबैका लागि खुला’ गरिने उल्लेख गरेका छन्।
सम्झौताका लागि मध्यस्थकर्ताको भूमिका निर्वाह गरिरहेको पाकिस्तानले पनि सम्झौता आगामी २४ घण्टाभित्र अन्तिम रूप दिइने र इलेक्ट्रोनिक हस्ताक्षरको प्रक्रियाका लागि तयारी अघि बढाइरहेको जनाएको छ।
यसअघि, इरानको विदेश मन्त्रालयका प्रवक्ता इस्माइल बागाईले हस्ताक्षरको सही मितिबारे प्रतिक्रिया दिँदै समझदारी ज्ञापनमा हस्ताक्षर भोलि नहुने, तर त्यसको ठ्याक्कै समय भने पर्खेर हेर्नुपर्ने बताएका थिए।
यद्यपि, ट्रम्पले ट्रुथ सोशलमार्फत् सम्झौतामा आज नै हस्ताक्षर हुने र हस्ताक्षरसँगै हर्मुज जलमार्ग पूर्ण रूपमा खुला हुने उल्लेख गरेका छन्।
इरानको समृद्ध युरेनियम भण्डारतर्फ संकेत गर्दै ट्रम्पले उपयुक्त समयमा, स्थिति शान्त भएपछि, अमेरिकाले उक्त ‘आणविक धुलो’ संकलन गरी पछि नष्ट गर्ने प्रक्रिया अघि बढाउने बताए।
तर ट्रम्पले यदि प्रक्रिया सहज र द्रुत रूपमा अघि बढ्न सकेन भने वाशिङ्टनसँग अन्तिम विकल्पका रूपमा अन्य उपाय अवलम्बन गर्ने सामर्थ्य रहेको चेतावनी दिँदै त्यस्तो परिस्थिति पुनः सिर्जना नहोस् भन्ने आशा व्यक्त गरेका छन्।
यसअघि शनिबार बिहान, पाकिस्तानका प्रधानमन्त्री शाहबाज शरीफले विगतका अवस्थाको तुलनामा अहिले शान्ति सम्झौता धेरै नजिक पुगेको बताएका थिए।
एक्समार्फत जारी वक्तव्यमा शरीफले आगामी २४ घण्टाभित्र सम्झौता अन्तिम रूपमै पुग्ने सम्भावना रहेकाले पाकिस्तानले इलेक्ट्रोनिक हस्ताक्षरको तयारी गरिरहेको जानकारी दिएका छन्।
