काठमाडौँ — बेलायतको उत्तरी आयरल्यान्डस्थित बेलफास्ट शहरमा भएको चक्कु आक्रमणको विरोधमा आप्रवासनविरोधी समुहले प्रदर्शन चर्काएको छ । उक्त प्रदर्शनका क्रममा सवारी-साधन र भवनहरूमा आगजनी गरिएको छ ।

चक्कु आक्रमणको अभियोगमा एक सुडानी नागरिक पक्राउ परेका थिए । उनको आक्रमणबाट एक व्यक्ति गम्भीर घाइते भएका थिए ।

मंगलबार प्रदर्शनकारमा उत्रिएकामध्ये धेरैजनाले मुख छोपेका थिए । उनीहरुले शहरको एउटा स्थानमा भेला भएर बस तथा केही कारमा आगो लगाए । 

सहरको केन्द्र नजिकैको एउटा भवनमा पनि आगजनी गरिएको थियो । स्थानीय बासिन्दाहरूले एएफपी समाचार संस्थालाई बताएअनुसार प्रदर्शनकारीहरूले फोहोरका डस्टबिनमा आगो लगाएर पेट्रोल बमसमेत प्रहार गरेका थिए ।

उत्तरी आयरल्यान्डकी फर्स्ट मिनिस्टर मिशेल ओ निलले प्रदर्शनको कडा आलोचना गर्दै शान्त रहन आग्रह गरेकी छिन् ।

'मुख छोपेका मानिसहरूको समूहले आगजनी गरेर परिवारहरुलाई भाग्न बाध्य गराउनु घृणित कायरताबाहेक केही होइन,' उनले भनिन्, 'रंगभेद, धम्की र हिंसा जहाँ भए पनि गलत हुन् । आज रातिका यी आक्रमणहरूको कुनै बहाना वा औचित्य हुन सक्दैन । हाम्रो सडकमा यस्तो दृश्य कसैले पनि देख्न चाहँदैन, त्यसैले म फेरि शान्तिको अपिल गर्छु ।'