काठमाडौँ — इरानले बहराइन, कुवेत र जोर्डनमा रहेका अमेरिकी सैन्य बेसहरूमा आक्रमण गरेको छ । हर्मुज जलमार्गका इरानी बन्दरगाह र टापुहरूमा अमेरिकाले गरेको हमलाको जवाफमा प्रत्याक्रमण गरिएको इरानको इस्लामिक रिभोलुसनरी गार्ड कर्प्स (आइआरजीसी) को दाबी छ । 

यसमा अमेरिकी पाँचौं फ्लिट , कुवेतको अली अल सलेम एयरबेस, जोर्डनको अजराकस्थित एयरबेसलगायत पर्छन् । अल सलेममा ड्रोन तथा अजराकमा  लामो दूरीको क्षेप्यास्त्र प्रहार गरिएको आइआरजीसीले जनाएको छ । 

अमेरिकी सेनाका २१ वटा ठेगानामा निशाना लगाइएको र  त्यसमध्ये चारवटा क्षेत्र ध्वस्त गरिएको आइआरजीसीको दाबी छ । जोर्डनको आधारमा रहेको एफ-३५ लडाकु विमानको मर्मत तथा भण्डारण स्टेशनलाई ध्वस्त गरिएको आइआरजीसीको दाबी छ । 

त्यस्तै, इरानी सहर जामको आकाशमा एउटा अमेरिकी एमक्यू-९ ड्रोन खसालिएको दाबी आइआरजीसीको छ ।

मंगलबार बिहान अमेरिकी सेनाले हर्मुज जलमार्गमा रहेका केश्म टापु र इरानी तटवर्ती बन्दरगाहहरूमा आक्रमण गरेको थियो । इरानमाथि आफ्नो  अपाचे हेलिकप्टर खसालेको आरोप लगाउँदै अमेरिकाले यो आक्रमण गरेको थियो ।  

 उक्त आक्रमणले सिरिक सहरको एउटा दूरसञ्चार टावरमा क्षति पुगेको इरानी सञ्चारमाध्यमहरुले जनाएका छन् । त्यस्तै, त्यहाँका दुईवटा पानीका ट्याङ्कीहरू पनि ध्वस्त भएका थिए ।