काठमाडौँ — काठमाडौँ — इरान र अमेरिकाबीच युद्ध अन्त्यका लागि शान्तिवार्ताको तयारी चलिरहेका बेला इजरायलले दक्षिणी लेबनानमा भीषण हवाई आक्रमण गरेको छ । आक्रमणमा परी एक जनाको मृत्यु भएको छ भने भौतिक संरचनामा ठूलो क्षति पुगेको छ ।

लेबनानको राष्ट्रिय समाचार एजेन्सी (एनएनए) का अनुसार दक्षिणी लेबनानको टायर जिल्लास्थित मारकेह नगरपालिकामा भएको इजरायली हवाई आक्रमणमा एक नागरिकको मृत्यु भएको हो । शनिबार बिहानसम्म जारी रहेको आक्रमणका कारण दक्षिणी लेबनानको बिन्त जबेलमा कयौँ आवासीय घर र सरकारी भवनहरू ध्वस्त भएका छन् ।

यसअघि शुक्रबार पाकिस्तानी प्रधानमन्त्री शहबाज सरिफले अमेरिका र इरानबीच युद्ध अन्त्यका लागि सम्झौताको मस्यौदामा सहमति जुटिसकेको र मध्यस्थकर्ताहरूले त्यसलाई अन्तिम रूप दिने तयारी गरिरहेको बताएका थिए ।

इरानी सञ्चारमाध्यमहरूका अनुसार नयाँ सम्झौता भएमा लेबनानसहित सबै मोर्चामा जारी युद्धको अन्त्य हुनेछ । तर, इजरायली नेतृत्वले लेबनानमा कब्जा गरेको भूभागबाट तत्काल पछि हट्ने आफ्नो कुनै योजना नरहेको स्पष्ट पारेको छ ।

पछिल्लो आक्रमणलाई इजरायल र लेबनानी अधिकारीहरूबीच यसै महिनाको सुरुमा भएको युद्धविराम सहमतिको उल्लङ्घनका रूपमा हेरिएको छ । अमेरिकी मध्यस्थतामा गत जुन ४ मा दुई देशबीच युद्धविरामको सहमति भएको थियो । दुई पक्षबीच आगामी जुन २२ मा दोस्रो चरणको विस्तृत वार्ता हुने तय भए पनि इजरायलले लगातार आक्रमण जारी राखेको छ ।

यसैबीच, इजरायली सेनाले शनिबार एक आदेश जारी गर्दै दक्षिणी लेबनानका २० वटा सहर र गाउँका बासिन्दाहरूलाई तत्काल घर छोडेर 'जहरानी नदीको उत्तरतर्फ' जान चेतावनी दिएको छ । यसले गर्दा उक्त क्षेत्रमा पुनः ठूलो संख्यामा नागरिकहरू विस्थापित हुने खतरा बढेको छ ।