वर्षातको मौसममा पनि स्वदेशीसँगै भारतीय पर्यटकको आगमनले पोखरा यतिबेला गुलजार छ ।
पोखरा — मंगलबार बिहान पर्यटकीय नगरी पोखराको मौसम खुलेको थियो । ताल, पहाड र हिमाल छर्लङ्ग देखिएका थिए । क्षणमै बादल लाग्ने, पानी पर्ने र घाम लाग्ने पोखरामा मंगलबार बिहान लामो अवधि मौसम सफा रह्यो । त्यसको लाभ उठाउँदै पोखरा घुम्न आएका पर्यटक सबेरै फेवा तालमा पुगेका थिए ।तालमा पर्यटकको पहिलो रोजाइ सब बोट (सर्फिङ) बनेको देखियो । एक घण्टाको दुई सय रुपैयाँ तिरेर सर्फिङमा रमाउनेसँगै काठका डुंगामा ताल घुम्ने र तालबराही मन्दिर दर्शन गर्नेको संख्या पनि उल्लेख्य थियो । वर्षातको मौसममा स्वदेशीसँगै भारतीय पर्यटकको आगमनले पोखरा यतिबेला गुलजार छ ।
