संविधान संशोधन गर्ने कांग्रेस–एमाले सहमति मान्दैनौं : खनाल
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — पूर्वप्रधानमन्त्री तथा नेकपा (एकीकृत समाजवादी) का सम्मानित नेता झलनाथ खनालले संविधान संशोधन गर्ने कांग्रेस–एमालेबीचको सहमति मान्य नहुने बताएका छन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![संविधान संशोधन गर्ने कांग्रेस–एमाले सहमति मान्दैनौं : खनाल](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/jhalanath-0862024013750-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
पुष्पलाल स्मृति प्रतिष्ठानले शनिबार काठमाडौंमा आयोजना गरेको कार्यक्रममा खनालले सत्तारुढ पार्टीले सत्ता स्वार्थका लागि गरेको सहमति स्वीकार्य नहुने बताएका हुन् । समानुपातिक प्रणालीलाई मास्ने गरी दुई ठूला दलबीच सहमति भएको भनिएको सुनिएको उल्लेख गर्दै उनले त्यस्तो गर्न लागिए विरोध गर्ने बताए । संविधान संशोधनको विषयलाई ठूला राजनीतिक दलहरूले खेलाँचीको विषय बनाउन नहुने पनि उनले सुझाव दिए ।
‘अहिलेसम्म यी दुई वटा पार्टीले गरेको तथाकथित सहमति खै कहाँ आयो त यो ? संसद्मा पनि ढाँटिएको छ हेर्नुस्, संसद्मा त्यसको हस्ताक्षर गरिएको पत्र किन प्रस्तुत गर्न सकिएन ? ती पार्टीहरूले किन गर्न सकेनन् ? किन लुकाइरहेका छन् ती कुरा ? कसैले ९ बुँदे भन्दैछन् । ९ बुँदे हो कि १५ बुँदे हो कि ? के थाहा हामीलाई ? खै सही गरेको सहमती पत्र ? हामी त्यो चाहन्छौ,' खनालले भने, 'के मा संशोधन गर्ने ? यो संविधानसभाले बनाएको संविधान हो । कसैको निगाहले बनाइएको होइन । दुई वटा पार्टीले मात्रै बनाएको पनि होइन । संविधानसभाको म्यान्डेटलाई अभिव्यक्ति नगर्ने कुनैपनि संशोधन नेपाली जनतालाई मान्य हुँदैन । संविधान संशोधन यस्तो खेलाँची खेल होइन । दुईवटा पार्टीले आफ्नो सत्ता स्वार्थका लागि यस्तो गट्टी खेल गर्नुहुन्छ ?'
संसद्मा समानुपातिक प्रतिनिधित्व अन्त्य गर्नका लागि संविधान संशोधन गर्न लागेको खनालको भनाइ थियो । त्यसको विरोधमा देशभर विरोध हुने पनि उनले बताए । 'विभिन्न समूह, जाति, समूह, क्षेत्र आदिलाई प्रतिनिधित्व गराउनका लागि हामीले ल्याएको यो समानुपातिक प्रणाली हो । समानुपातिक प्रणालीले कमजोर, साना, पीछडिएका समूहरूको हितलाई प्रतिनिधित्व गरिरहेको छ,' उनले भने ।
![](https://assets-cdn.ekantipur.com/uploads/source/ads/900-x-100-1-0282024055738.gif)