इजरायल र प्यालेस्टाइनबीच संघर्षविराम

अमेरिका,इजिप्ट, कतार र संयुक्त राष्ट्र संघलगायतको पहलमा ११ दिन लामो द्वन्द्व अन्त्य भएको छ ।

काठमाडौँ — इजरायल र प्यालेस्टिनी विद्रोही हमास संर्घषविरामका लागि सहमत भएका छन् । ११ दिन लामो हिंसात्मक द्वन्द्वपछि उनीहरु संघर्षविरामका लागि तयार भएका हुन् ।

बीबीसीका अनुसार शुक्रबार बिहानदेखि संघर्षविराम लागू भएको छ । पछिल्लो द्वन्द्वमा १ सय जना बालबालिका र महिलासहित कम्तीमा २ सय ३२ जना प्यालेस्टिनी नागरिकको मृत्यु भएको छ ।

त्यस्तै इजरायलतर्फ २ जना बालबालिकासहित १२ जनाको मृत्यु भएको छ । इजरायली सेनाका अनुसार हमासले अहिलेसम्म करिब ४ हजार रकेट प्रहार गरेको थियो । त्यस्तै इजरायली सेनाले पनि सयौँ हवाई आक्रमण गर्दै गाजामा रहेका महत्त्वपूर्ण भौतिक संरचना ध्वस्त बनाएको थियो ।

बिहीबार राति इजरायली मन्त्रिपरिषद्ले ‘आपसी समझदारी र बिनासर्त’ संघर्षविराम गर्न अनुमति दिएको थियो । त्यस्तै हमासका अधिकारीले पनि स्थानीय समयअनुसार शुक्रबार बिहान २ बजेदेखि संघर्षविराम सु्रु भएको बताएका छन् । यसअघि बिहीबार हमासका राजनीतिक अधिकारी मूसा अबु मार्जुकले लेबनानी टेलिभिजन मायादीन टीभीसँगको कुराकानीमा एक दुई दिनमै संघर्षविराम हुने बताएका थिए ।

गाजाको पुनर्निर्माण गर्न इजिप्टले प्यालेस्टाइनलाई ५० करोड डलर दिने

केही दिनयता इजरायल र प्यालेस्टाइनमाथि संघर्षविरामका लागि चर्को दबाब आएको थियो । अमेरिकी राष्ट्रपति जो बाइडेनले इजरायली प्रधानमन्त्रीलाई बुधबार मात्रै फोन गरेर संघर्षविरामको पहल गर्न आग्रह गरेका थिए । हिंसा सुरु भएपछि उनले नेतान्याहुलाई ४ पटक फोन गरेका थिए ।

त्यस्तै इजिप्ट, कतार र संयुक्त राष्ट्र संघले पनि गाजामा शासन गर्ने हमास र इजरायलबीच संघर्षविरामका लागि महत्त्वपूर्ण भूमिका निर्वाह गरेका थिए । इजिप्टका राष्ट्रपति अब्देल फतह अल सिसीले दुई वटा सुरक्षा टोलीलाई इजरायल र प्यालेस्टाइनबीचको संघर्षविरामका लागि पहल गर्न निर्देशन दिएका थिए ।

^{इजिप्टका राष्ट्रपति अब्देल फतह अल सिसी}

राष्ट्रपति सिसीले अमेरिकी राष्ट्रपति जो बाइडेनले संघर्षविरामका लागि गरेको पहलका लागि प्रशंसा गरेका छन् । ‘संघर्षविरामका लागि इजिप्टले गरेको पहलमा महत्त्वपूर्ण भूमिका खेल्दै सफल भएकोमा म अमेरिकी राष्ट्रपति जो बाइडेनलाई आभार व्यक्त गर्दै प्रशंसा गर्दछु,’ संर्घषविरामको घोषणा भएपछि शृंखलाबद्ध रुपमा ट्वीट गर्दै उनले भनेका छन् ।

अमेरिकी राष्ट्रपति जो बाइडेनले संघर्षविरामले प्रगतिका लागि वास्तविक अवसर ल्याएको प्रतिक्रिया दिएका छन् । त्यस्तै संयुक्त राष्ट्र संघका महासचिव एन्टोनियो गुटेरसले पनि संघर्षविरामको स्वागत गरेका छन् । बिहीबार राति एक वक्तव्य जारी गर्दै उनले संघर्षविरामको स्वागगत गरेका हुन् । साथै उनले द्वन्द्वमा मारिनेहरुप्रति श्रद्धाञ्जली व्यक्त गर्दै परिवाजनप्रति समवेदना प्रकट गरेका छन् ।

तस्बिर : रोयटर्स

अलजजिराका अनुसार संघर्षविराम घोषणा भएपछि जेरुसेलम शान्त देखिएको र गाजामा प्यालेस्टिनी नागरिकले खुसीयाली मनाएका छन् ।

गाजा क्षेत्रमा भड्किएको हिंसा सन् २०१४ यताकै गम्भीर हो । यसको सुरुवात पूर्वी जेरुसेलममा गत शुक्रबार अल मक्सा मस्जिदनजिक भएको झडपबाट सुरु भएको हो । त्यसको तीन दिनपछि सोमबारदेखि भने दुवै पक्षबाट रकेट र मिसाइल हमला भइरहेको थियो ।

पछिल्ला केही दिनदेखि जेरुसेलममा हिंसा भड्किइरहेको थियो । जेरुसेलमस्थित अल अक्सा मस्जिदमा जान प्रतिबन्ध लगाइएपछि प्यालेस्टाइनका नागरिक क्रुद्ध भएका थिए । यो मस्जिदलाई इस्लाममा तेस्रो पवित्र स्थान मानिन्छ । यो यहुदीहरुको पनि पवित्र धार्मिक स्थलमा रुपमा रहेको छ ।

‘जेरुसेलम दिवस’ मनाइरहँदा हिंसा भड्किएको हो । सन् १९६७ को अरब–इजरायल युद्धपछि पूर्वी जेरुसेलममाथि कब्जा गरिएको सम्झनामा गत सोमबार जेरुसेलम दिवस मनाइएको थियो ।

तस्बिर : रोयटर्स

हमासले अल अक्सा र शेख जराह मस्जिदबाट प्रहरी हटाउन पहिलेदेखि नै इजरायलसँग आग्रह गर्दै आएको थियो । उसले दिएको समयसीमा सकिएपछि रकेट प्रहार गरेको बताएको छ ।

इजरायललाई ७३५ मिलियन डलर बराबरको हतियार बेच्दै अमेरिका

सन् १९६७ को मध्यपूर्वको युद्धपछि इजरायलले पूर्वी जेरुसेलममाथि कब्जा गरेको थियो । त्यसपछि उसले पूरा जेरुसेलमलाई आफ्नो राजधानी दाबी गर्दै आएको छ । तर अन्तर्राष्ट्रिय समुदायले यसलाई मान्दैन । प्यालेस्टाइनले भने पूर्वी जेरुसेलमलाई भविष्यको एक सार्वभौम र स्वतन्त्र मुलुकको राजधानीका रुपमा लिँदै आएको छ ।

यही विषयमा प्यालेस्टाइन र इजरायलबीच विवाद रहँदै आएको छ भने पटक–पटक यसले युद्धको रुप लिएको छ । सन् २०१४ को जुलाईदेखि अगस्टको बीचमा भएको द्वन्द्वमा २२५१ प्यालेस्टाइनी मारिएका थिए । तीमध्ये १४६२ त सर्वसाधारण नै थिए । त्यस्तै इजरायलका ६ सर्वसाधारणसहित ६७ जना सैनिक मारिएका थिए ।

सम्बन्धित समाचार