परिवारले बुझे सुन्दर हरिजनको शव

घटनाबारे छानबिन गर्न गठित समितिले कारागार विभागलाई प्रतिवेदन बुझाएको भोलिपल्ट मंगलबार परिवारजनले शव बुझेका हुन् । कारागार विभागले जेठ ६ मंगलबार विभागका निर्देशक झरेन्द्र प्रसाद चापागाईंको नेतृत्वमा छानबिन समिति गठन गरेको थियो।

हरिजनको आत्महत्या सम्बन्धमा छानबिन गर्न बनाइएको कारागार विभागका निर्देशक झरेन्द्रप्रसाद चापागाईं नेतृत्वको समितिले सोमबार प्रतिवेदन बुझाएका थिए । प्रतिवेदनमा रोल्पा कारागारका अधिकारीको कुनै संलग्नता नरहेको भनिएको थियो ।

नाबालक रहेकै अवस्थामा नेपालगन्जका सुन्दर हरिजनलाई कारागार पठाइएको र जघन्य अपराधमा मुछिएका सुर्खेतका विजयविक्रम शाहलाई छुटाएर हरिजनलाई शाहको सजाय भुक्तान गर्न लगाइएको परिवारको आरोप छ ।

समिति संयोजक चापागाईंले हरिजनको मृत्यु आत्महत्याबाटै भएको देखिएको, शाह जेलबाट हरिजनको नाममा भागेको तर उनको सजाय हरिजनले नै भोग्दै गरेको पाइएको बताए ।

‘जेलमा रहनुपर्ने शाह भागेको र उनको सट्टामा हरिजन जेलमा रहेको पाइयो,’ उनले भने, ‘यो एउटा प्रारम्भीक अनुसन्धान हो । यो कसरी हुन गयो भन्नेबारे शाह पक्राउ परेपछि धेरै कुरा खुल्ने छ ।’

बाँकेको नेपालगन्ज–२ स्थित घरवारीटोलका सुन्दर हरिजनको रोल्पा कारागारमा शंकास्पद मृत्यु भएको भन्दै परिवारले दाहसंस्कार गर्न मानेका थिएनन् ।

हरिजनको शव नेपालगन्ज मेडिकल कलेज शिक्षण अस्पताल नेपालगन्जमा राखिएको थियो । घटनाको सत्यतथ्य छानबिन गरी दोषीलाई कारबाही नहुँदासम्म शवको अन्त्येष्टि नगर्ने मृतकका परिवार तथा आफन्तले अडान राख्दै आएका थिए ।

विजय विक्रमको नाममा सजाय काटिरहेका सुन्दर जेठ ४ गते रोल्पा कारागारको शौचालयभित्र झुण्डिएको अवस्थामा फेला परेपछि घटनाले रहस्यमय बन्दै गएको हो ।

सुन्दर हरिजन मृत्यु प्रकरण : भरतपुरमा विरोध प्रदर्शन

सुन्दर हरिजन मृत्यु प्रकरण : संसदीय छानबिन समिति गठन गर्न माग

सुन्दर हरिजन मृत्यु प्रकरण : गृहमन्त्रीद्वारा छानबिन समिति गठन