हिंसाको मारमा सञ्‍चार संस्था : इजरायली सेनाको आक्रमणमा अलजजिरा र एपीको कार्यालय ध्वस्त- विश्व - कान्तिपुर समाचार
कान्तिपुर वेबसाईट
AdvertisementAdvertisement

हिंसाको मारमा सञ्‍चार संस्था : इजरायली सेनाको आक्रमणमा अलजजिरा र एपीको कार्यालय ध्वस्त

एपीका अध्यक्ष भन्छन्- 'आजको घटनाले अब गाजामा के भइरहेको छ भन्ने कुरा विश्वले कमै मात्र थाहा पाउनेछ'
कान्तिपुर संवाददाता

काठमाडौँ — प्यालेस्टाइनको गाजास्थित १२ तले टावरमा रहेका अमेरिकी समाचार संस्था एसोसिएटेड प्रेस (एपी), कतारी सञ्चारमाध्यम अल जजिरालगायत थुप्रै कार्यालय तथा अपार्टमेन्ट ध्वस्त भएका छन्।

इजरायलले शनिबार प्यालेस्टाइनको गाजास्थित जाला टावरमा गरेको  हवाई आक्रमण (इन्सेटमा ढल्दै गरेको  टावर) ।  तस्बिर : एपी

टावरका मालिक जवाद मेहदीलाई इजरायली सेनाले एक घण्टाअघि फोन गरेर आक्रमण गर्न लागिएको भन्दै टावर खाली गराउन आदेश दिएका थिए । मेहदीका अनुसार पत्रकारका उपकरण लैजान १० मिनेट समय थप्न आग्रह गरे पनि इजरायली सेनाले अस्वीकार गरेको थियो।

कतार सरकारको लगानीमा सञ्चालित अल जजिराले आक्रमणको दृश्य प्रत्यक्ष प्रसारण गरेको थियो। भवनमा प्यालेस्टिनी विद्रोही समूह हमासका सैन्य सामग्री रहेको दाबी इजरायली सेनाको छ । एपीका अध्यक्ष तथा प्रमुख कार्यकारी अधिकृत ग्यारी प्रुइटले वक्तव्य जारी गर्दै भवनमा हमासको गतिविधि रहेको कुनै संकेत नपाएको बताएका छन् । उनले थाहा पाइपाई कहिल्यै आफ्ना पत्रकारलाई जोखिममा नराख्ने पनि बताएका छन् ।

गाजामा रहेर समाचार सम्रेषण गरिरहेका मिडियामाथि आक्रमण भएपछि अब त्यहाँको अवस्था सार्वजनिक नहुने उनको भनाइ छ । 'आजको घटनाले अब गाजामा के भइरहेको छ भन्ने कुरा विश्वले कमै मात्र थाहा पाउनेछ,' अध्यक्ष प्रुइटले भने ।

इजरायली सेनाले शनिबार गाजाको शरणार्थी शिविरमा गरेको आक्रमणमा ८ बालबालिकासहित १० जनाको मृत्यु भएको छ । हमासको जवाफी आक्रमणमा एक इजरायली मारिएका छन्। सोमबारयता इजरायली आक्रमणबाट ३९ बालबालिकासहित १४० प्यालेस्टिनीको ज्यान गइसकेको छ । इजरायलतर्फ हालसम्म ९ जना मारिएका छन्। गत सोमबार 'जेरुसेलम दिवस' मनाउने क्रममा हिंसा भड्किएको हो।

प्रकाशित : जेष्ठ २, २०७८ ०९:४७
प्रतिक्रिया
पठाउनुहोस्

अनलाइन कक्षा पनि बन्द !

‘कोरोनाको प्रभाव कम भएन भने हाम्रो भविष्य नै अन्योल हुन्छ’
मेनुका ढुंगाना

अछाम — मंगलसेन नगरपालिका–५ की अन्सा ढुंगाना धनगढीमा नर्सिङ पढिरहेकी छन् । कोरोना संक्रमणले कैलालीमा निषेधाज्ञा भएपछि उनी अछाम घर आइन् । उनको अनलाइन कक्षा निरन्तर नै चलिरह्यो । पढाइलाई निरन्तरता दिन जसरी पनि उनी इन्टरनेटको पहुँचमा पुग्छिन् । कक्षामा सहभागी हुन्छिन् ।

लकडाउनमा पढाइ नभएपछि खेल्न जम्मा भएका मंगलसेनका बालबालिका । तस्बिर : मेनुका ढुंगाना /कान्तिपुर

‘पढाइ भइरहेको छ । खासै फरक परेको छैन । अनलाइनमा पहिलो पटक पढेकी हुँ,’ उनले भनिन्, ‘अब कलेज सुरु हुँदा पनि नपढेको विषय पढ्ने कुरा भएको छ । अहिले पढेको दोहोरिँदैन ।’ भौतिक रूपमा कक्षामा सहभागी नहुँदा पनि अनलाइन पढाइ भइरहेकाले अन्सा खुसी छिन् ।

तर, अछाममै पढ्ने विद्यार्थी भने अनलाइन कक्षाबाट वञ्चित छन् । मंगलसेन ५ की आइशा र अन्साले एउटै स्कुलबाट सँगै एसईई दिएका थिए । आइशा साँफेबगरस्थित जनकल्याण माविमा सर्भे विषय पढ्छिन् । उस्तै प्राविधिक विषय पढिरहे पनि आइशाको भने अनलाइन पढाइ छैन । यसले अछाममा पढ्ने विद्यार्थी भने आफ्नो कोर्स पूरा हुनबाट वञ्चित छन् । ‘धनगढी र काठमाडौं पढ्ने विद्यार्थी अछामबाट अनलाइन कक्षा लिन्छन् । हामी भने कलेज सुरु हुने दिनको पर्खाइमा छौ,ं’ आइशाले भनिन्, ‘यहाँका प्राविधिक विषय पढाउने विद्यालयले पनि यसरी कक्षा सञ्चालन गरेको भए अलि राहत मिल्थ्यो होला । कोरोनाको प्रभाव कम भएन भने हाम्रो भविष्य नै अन्योल हुन्छ ।’

मंगलसेन–५ का बिस्नु ढुंगाना शोडषा मावि मंगलसेनमा ८ कक्षामा पढ्छन् । गत वर्ष ७ कक्षाको परीक्षा दिएपछि लकडाउन भयो । बीचमा ७ कक्षाको नतिजा आयो । ८ कक्षाको पढाइ पुसबाट नियमित भयो । ४ महिना नियमित विद्यालय सञ्चालन भए पनि कुनै पनि विषय पूरा पढाइ भएका छैनन् । ‘जेठ २ गतेबाट दोस्रो चरणको परीक्षा हुने कुरा थियो । लकडाउनले वैशाख १३ गते नै विद्यालय बन्द भए । अब के हुन्छ भन्ने थाहा छैन,’ उनले भने, ‘लकडाउन भयो । ३ वटा परीक्षा हुनुपर्थ्यो । एउटा मात्रै भएको छ । अहिले घरमा त्यत्तिकै बसिरहेका छौं । आफैं पढ्छौं ।’

अघिल्लो शैक्षिक सत्र जस्तो यो शैक्षिक सत्रमा शिक्षकले मनोमानी ढंगले नतिजा सार्वजनिक गर्न नसक्ने शोडषा मावि मंगलसेनका प्रधानाध्यापक देवेन्द्र दुवे बताउँछन् । उनका अनुसार शोडषा माविका कुनै पनि विषयको पूरा पढाइ भएको छैन । ‘अहिले नियमित ३ महिना पढाइ भएको छ । पूरा कोर्स हुनलाई कम्तीमा ७ महिना पढाइ हुनुपर्छ । अहिलेसम्म विद्यार्थी उत्तीर्ण हुनेसम्मको पढाइ भएको छैन,’ उनले भने, ‘यस्तै अवस्थामा परीक्षा लिन र मूल्यांकन गर्न गाह्रो हुन्छ । अर्धवार्षिक परीक्षाले सबै मूल्यांकन हुँदैन ।’ जिल्लामा कोरोना संक्रमणको बढेपछि ७८ हजार विद्यार्थीको पढाइ अन्योल भएको शिक्षा विकास तथा समन्वय इकाइ अछामका प्रमुख लक्ष्मण गिरी बताउँछन् । सामुदायिक विद्यालय ४ सय ८५ र संस्थागत १९ मा पढ्ने विद्यार्थी तनावमा रहेको उनले बताए ।

‘अहिलेसम्म अछामका कुनै विद्यालयले अनलाइन कक्षा सञ्चालन गर्न सकेका छैनन् । सबै एकै ठाउँमा बसेर छलफल गर्न पाएका छैनौं । धेरैजसो शिक्षक विद्यार्थी पनि संक्रमित छन्,’ उनले भने ।

प्रकाशित : जेष्ठ २, २०७८ ०९:४५
पूरा पढ्नुहोस्
प्रतिक्रिया
पठाउनुहोस्
×