यु–१९ महिला क्रिकेट टोली मलेसियाका लागि बिदाइ

कान्तिपुर संवाददाता

काठमाडौँ — आईसीसी यु–१९ महिला विश्वकप अन्तर्गत एसिया छनोटका लागि मलेसिया जाने नेपाली यु–१९ टोलीलाई मंगलबार बिदाइ गरिएको छ ।

नेपाल क्रिकेट संघ (क्यान) ले मंगलबार एक कार्यक्रमको आयोजना गरी बुधबार मलेसियातर्फ जाने किशोरी टोलीको बिदाइ गरेको हो । टोलीलाई क्यानका अध्यक्ष चतुरबहादुर चन्द, कोषाध्यक्ष रोशन सिंह लगायत टोलीले बिदाइ गरेको छ । बिदाइपछि बोल्दै नेपाली टोलीकी कप्तान कीर्तिका मरासिनीले शीर्ष टोली भएर विश्वकपमा स्थान बनाउने लक्ष्यका साथ तयारी गरेको प्रतिक्रिया दिइन् ।

साथै उनले लक्ष्यमा पुग्ने विश्वास व्यक्त गरिन् । ‘पहिलोपटक आयोजना हुन लागेको प्रतियोगितामा सहभागी हुँदैछौं । एक महिना लामो अभ्यास अन्तर्गत हामीले राम्रो तयारी गरेका छौं । राम्रो खेलेर छनोट हुने लक्ष्य राखेका छौं,’ उनले भनिन् ।

यसअघि क्यानले छनोटका लागि कीर्तिका मरासिनीको कप्तानीमा १४ सदस्सीय टोलीको घोषणा गरिसकेको छ । एक महिना लामो अभ्यास गरेको टोलीले राम्रो नतिजा निकाल्नेमा मुख्य प्रशिक्षक महेश रिजाल विश्वस्त देखिएका छन् । ६ टिमले सहभागिता जनाएको प्रतियोगितामा शीर्ष टोली बन्दै नेपाल विश्वकपमा छनोट हुने मुख्य प्रशिक्षक रिजालले बताए ।

‘एक महिना लामो अभ्यासमा हामीले गर्नुपर्ने मिहिनेत हामीले गरेका छौं । राम्रो नतिजा निकाल्नेमा आशावादी छौं । ६ टिमले सहभागिता जनाएको प्रतियोगितामा अग्र स्थानमा रहँदै छनोट हुने हाम्रो लक्ष्य छ,’ रिजालले भने ।

मलेसियामा आयोजना हुने छनोटमा आयोजक मलेसियासहित नेपाल, संयुक्त अरब इमिरेट्स (यूएई), थाइल्याण्ड, भुटान र कतारले सहभागिता जनाउँदै छन् । नेपालले पहिलो खेल कतारसँग जुन ३ मा खेल्दै छनोटको सुरुआत गर्नेछ । नेपालले दोस्रो खेलमा यूएईविरुद्ध जुन ४ मा प्रतिष्पर्धा गर्ने तालिका रहेको छ भने भुटानविरुद्ध जुन ६ मा खेल्नेछ । त्यस्तै नेपालले जुन ७ मा थाइल्याण्ड र जुन ९ मा मलेसियाविरुद्ध खेल्नेछ । शीर्ष स्थानमा रहने टोलीले दक्षिण अफ्रिकामा हुने ट्वान्टी–२० विश्वकपमा स्थान बनाउनेछ ।

प्रकाशित : जेष्ठ १७, २०७९ १९:२८
प्रतिक्रिया
पठाउनुहोस्

काभ्रेमा रासायनिक मल अभाव भएपछि अगुवा किसान आन्दोलित

नगेन्द्र अधिकारी

काभ्रे — मकै र धान खेती गर्ने समयमा रासायनिक मल अभाव भएको भन्दै अगुवा किसानहरू आन्दोलिन भएका छन् । सत्तारुढ नेकपा (माओवादी केन्द्र) निकट अखिल नेपाल किसान महासंघ (क्रान्तिकारी केन्द्र) ले कृषि सामग्री कम्पनी लिमिटेड धुलिखेल शाखामार्फत वाग्मती प्रदेशको कृषि तथा पशुपंक्षी विकास मन्त्रालयलाई १० हजार टन युरिया र ५ हजार टन डीएपी मल उपलब्ध गराउन माग गरेको हो ।


क्रान्तिकारी केन्द्रले विज्ञप्ति बुझाउँदै मल, बीउविजन लगायत आधारभूत वस्तु उपलब्ध नहुँदा कृषकहरु मारमा परेको जनाएको छ । यस्तै रासायनिक मलको समस्या तत्काल समाधान नभए आन्दोलनमा जान बाध्य हुने उक्त संगठनका किसान नेताहरूले चेतावनी दिएका छन् ।

मलको कारोवार गर्दै आएको कृषि सामग्री कम्पनी लिमिटेडको धुलिखेलस्थित गोदाम र साल्ट ट्रेडिङ कर्पोरेसनको बनेपास्थित गोदाम खाली छ । कृषि सामग्रीका धुलिखेल शाखा प्रमुख वासुदेव शर्माले यसअघि नै भागवण्डा गरिएका १०–१५ वटा सहकारीले लैजान बाँकी रहेका करिब १६ सय बोरा मल बाहेक अरु मल सञ्चय नभएको बताए ।

वैशाखमा २ पटक गरेर आएको १ हजार ५१ टन मल मध्येबाटै काभ्रे, दोलखा, रामेछाप र सिन्धुपाल्चोकका ४ सय सहकारीमार्फत बिक्री गरिएको उनले जानकारी दिए । ग्लोबल टेण्डरमार्फत आउनुपर्ने अनुदानको मल आउन समय लागेको र सिञ्चिति पनि नरहेको समयमा खेतीको समयमा कृषकले मल अभाव खेप्नु परेको उनको तर्क छ ।

साल्ट ट्रेडिङ कर्पोरेसनको बनेपा शाखाका निमित्त शाखा प्रमुख सुरेन्द्र अवालेले युरिया, डीएपी, पोटास मलको शून्य मौज्दात भएको भन्दै सिंगल सुपर फस्फेट (एसएसपी), जिंक र बोरोन बिक्री गरिरहेको बताए । जेठ, असार, कात्तिक, मंसिरमा रासायनिक मलको माग उच्च हुने भए पनि १२ महिना नै यसको खपत हुन्छ ।

प्रकाशित : जेष्ठ १७, २०७९ १९:२०
पूरा पढ्नुहोस्
प्रतिक्रिया
पठाउनुहोस्
×