दुई छोरीको हत्यापछि न्यायको गुहार माग्दै तारामान
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
रुकम पूर्व — रुकुम पूर्वको पुथा उत्तरगंगा गाउँपालिका–३ रन्मामा मृत भेटिएका दुई छोरीको हत्यारालाई कारवाही नभएको गुनासो बुबा तारामान बुढाले गुनासो गरेका छन् । शनिबार काठमाडौंमा पत्रकार सम्मेलन गर्दै तारामानले हत्याको आरोपमा अरुलाई नै देखाएर वास्तविक दोषी छुटेको आरोप लगाएका हुन् । एकै घरका दिदीबहिनी रिना र काली बुढाको शव गत चैत २२ गते फेला परेको थियो ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![दुई छोरीको हत्यापछि न्यायको गुहार माग्दै तारामान](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/ranma-ghatana-ka-pidit-0801107-rkm-east-1922024063837-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
रिपोर्टस् क्लवमा आयोजित पत्रकार सम्मेलनमा बोल्दै मृतकका बुबा तारामानले हत्यामा संलग्न भएका स्थानीय तीन जना युवाहरूको नाम समेत लिएर उनीहरूलाई सामान्य सोधपुछ गरेर प्रहरीले छोडेकोमा गुनासो समेत गरे । ‘छोरीको हत्या गरेका भनेर प्रहरीले गाउँकै दुई जनालाई पक्राउ गर्यो । तरउनीहरूले सुधार गृहबाट आफूहरूले हत्या नगरेको भनेर हत्याबारे खुलाएर लेखेको पत्र मैले रुकुम पूर्व प्रहरीमा बुझाए,’ उनले भने, ‘यसबारेमा प्रहरीले केही पनि गरेन । हत्यारा खुलमखुला हिँडिरहेका छन् । मैले न्याय पाइनँ ।’
उनले आफूमाथि ठूलो अन्याय भएको भन्दै हत्यारा जोगाउन चलखेल भएको हुनसक्ने अनुमान समेत गरेका छन् । ‘मेरा छोरीहरूको ज्यान लिने अरु नै हुनु । तर यहाँ अर्कैलाई देखाएर वास्तविक हत्यारा उम्किए,’ उनले भनेका छन् ।
एक वर्षअघि घरबाट सिस्नो टिप्न भनेर गएका रिना र काली भोलिपल्ट घर नजिककैको जंगलमा मृत भेटिएका थिए । त्यसपछि अनुसन्धानमा जुटेको प्रहरीले चैत २४ गते हत्यामा संलग्न भएको आरोपमा सोही गाउँका १३ र ११ वर्षका दुई बालिकालाई पक्राउ गरेको थियो ।
ती दुई जनाले नै रिना र कालीको हत्या गरेको पुष्टि गर्दै घटना घटेको ३ महिनापछि रुकुम पूर्व जिल्ला अदालतले हत्यामा संलग्न भएका दुई बालिकालाई ६ महिनाका लागि सुधारगृहमा राख्न फैसला गरेको थियो ।
सोही फैसला अनुसार ६ महिना सुधारगृहमा बसेर निस्किएका दुई बालिकाहरूलाई समेत राखेर आयोजना गरिएको पत्रकार सम्मेलनमा ती दुई बालिकाले आफूहरू रिना र कालीको हत्या गरेको देखेपछि हत्याराले आफूहरूलाई पनि मार्ने धम्की दिएको र ज्यान जोगाउन हत्या स्वीकार गरेको बताएका छन् । उक्त हत्या गरेको स्वीकार नगरेपछि आफूहरूको समेत ज्यान जान सक्ने देखेर डरले हत्या गरेको स्वीकार गर्नुपरेको उनीहरूको भनाइ छ ।
उक्त पत्रकार सम्मेलनमा बोल्दै उनिहरूले आफूहरूलाई हत्या कसरी, कुन तरिकाबाट गरेको र कसरी प्रहरीलाई बताउने भनेर समेत हत्याामा संलग्न भएकाले सिकाएको र आफूहरूले त्यहीअनुसार नै भनेको बताएका छन् । मृतकका बुबाले नाम लिएका तीन जनाको नाम भन्दै उनीहरूले नै हत्या गरेको यी बालिकाहरूले पनि बताएका छन् ।
यस विषयमा जिल्ला प्रहरी कार्यालय रुकुम पूर्वका प्रहरी प्रमुख डीएसपी अञ्जना श्रेष्ठले हत्याबारे सम्पूर्ण अनुसन्धान गरिएको र प्राप्त दसी–प्रमाणका आधारमा नै दोसी पत्ता लगाएकोले प्रहरीको अनुसन्धानमा शंका नगर्न आग्रह गरिन् ।
‘घटनामा संलग्न भएका भनिएका तीन जनामाथि पनि हामीले अनुसन्धान र सोधपुछ गरेका छौं । तर उनीहरू हत्यामा संलग्न भएको अहिलेसम्म देखिएको छैन,’ उनले भनिन्, ‘अनुसन्धान पूरा होस् र प्रभावकारी होस् भन्ने चाहना त सबैको हुन्छ नी । यसकारण हामीले पूरा अनुसन्धान गरेका छौं र आवश्यक परेमा थप अनुसन्धान समेत गर्न सकिन्छ ।’
![](https://assets-cdn.ekantipur.com/uploads/source/ads/900-x-100-1-0282024055738.gif)