लुम्बिनीमा राष्ट्रिय सभा निर्वाचनको तयारी अन्तिम चरणमा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
दाङ — लुम्बिनी प्रदेशको राष्ट्रिय सभा निर्वाचनको लागि दाङको घोराहीस्थित कर्मचारी मिलन केन्द्रमा दुईवटा मतदान केन्द्र राखिएको छ । बिहीबार हुने चुनावका लागि तयारी अन्तिम चरणमा पुगेको प्रदेश निर्वाचन कार्यालयले जनाएको छ ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![लुम्बिनीमा राष्ट्रिय सभा निर्वाचनको तयारी अन्तिम चरणमा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/4157569707841170002069334255562726997382243n-2412024021246-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
मतदान केन्द्र ‘क’ मा लुम्बिनी प्रदेश सभाका ८७ जना सदस्यले र ‘ख’ केन्द्रमा लुम्बिनीका १२ जिल्लाका १ सय ९ स्थानीय तह नगरपालिका प्रमुख, उपप्रमुख, गाउँपालिका अध्यक्ष, उपाध्यक्ष गरी २ सय १८ जनालाई मतदान गर्ने व्यवस्था मिलाइएको निर्वाचन कार्यालयका सूचना अधिकारी गेहेन्द्र कुँवरले बताए ।
निर्वाचनमा प्रदेश सभा सदस्यका लागि सेतो रंगको कागजमा हरियो रंगको मसीको विवरणसहित निर्वाचन चिह्नको मतपत्र, नगर तथा गाउँपालिकाको लागि सेतो रंगको कागजमा रातो रंगको मसीको विवरण र निर्वाचन चिह्न रहेको मतपत्रको व्यवस्था गरिएको छ । अपांगको हकमा लाइन लाग्नुपर्ने छैन । मतदान केन्द्रमा बिहीबार बिहान ११ देखि दिउँसो ३ बजेसम्म मतदान हुनेछ ।
निर्वाचनका लागि सबै सुरक्षा व्यवस्था मिलाइएको छ । कर्मचारीको जिम्मेवारी तोक्ने काम, व्यवस्थापन, निर्वाचन सामग्रीको काम सकिएको र अहिले मतदानस्थल निर्माण भइरहेको उनले बताए ।
दुईवटा मतदान केन्द्रमा १०/१० जना कर्मचारी खटिनेछन् । एउटा मतदान केन्द्रमा मतदान अधिकृत, सहायक मतदान अधिकृत, सहायक कर्मचारी र कर्मचारी सहयोगी गरी १० जना हुनेछन् । मतपत्र, मतदाता नामावली, ब्यालेट बक्स लगायतका सामाग्रीको व्यवस्थापन भैसकेको छ ।
लुम्बिनी प्रदेशका २ सिटका लागि ६ जनाको उम्मेदवारी परेको छ । महिला र अन्य गरी दुई सिटमा निर्वाचन हुनेछ ।
सत्ता गठबन्धनबाट माओवादीले अन्यमा रोल्पाका झक्कुप्रसाद सुवेदी र कांग्रेसले महिला क्लस्टरमा गुल्मीकी विष्णुकुमारी सापकोटालाई उम्मेदवार बनाएको छ ।
प्रतिपक्ष दल एमालेले महिलातर्फ दाङकी तुलसाकुमारी केसी र अन्य क्लष्टरतर्फ पाल्पाका झपेन्द्रबहादुर घर्ती क्षेत्रीलाई उम्मेदवार बनाएको छ । त्यस्तै राप्रपाले महिलातर्फमा कपिलवस्तुकी विजया लक्ष्मीसिंह र अन्यमा रुपन्देहीका निरञ्जन थापा उम्मेदवार छन् । जनमत पार्टीले अन्यमा नवलपरासीका बालगोविन्द चौधरीलाई उम्मेदवार बनाएको छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)