पहिरोको उच्च जोखिमका कारण अर्घाखाँचीमा १४ घरका ५७ जनालाई सुरक्षित स्थानमा सारिएको छ । घर वरपर जमिन चर्किने, घर माथिबाट लेदो बग्ने कारणले ती घर परिवारलाई प्रहरीले स्कुल, स्वास्थ्य चौकी र आफन्तको घरमा सारेको छ ।
तीन दिनदेखि लगातार परेको वर्षाका कारण सन्धिखर्क-गोरुसिंगे सडक अवरुद्ध भएको छ । सन्धिखर्क नगरपालिकाको घुम्ती भन्ने स्थानमा हिजोदेखि पहिरो खसिरहेकाले बाटो अवरुद्ध भएको प्रहरीले जनाएको छ ।
दसैंको टिका लगाउन मामाघर हिँडेका १० वर्षीय बालकलाई खोलाले बगाउँदा दुई दिनदेखि बेपत्ता छन् । सन्धिखर्क नगरपालिका- ७ खाँचीकोट किटेनीका निवासी तारा पौडेलका १० वर्षीय छोरा समीर पौडेललाई स्थानीय फज्याङ खोलाले बुधबार बगाएको प्रहरी निरीक्षक अर्जुन पौडेलले बताए । धमिलो बाढीसहितको खोला तर्दै गर्दा बगाएको आमा तारा पौडेलले जानकारी दिइन् ।
सन्धिखर्क-गोरुसिंगे रुटमा सवारीसाधनले दसैंका यात्रुसँग दोब्बर भाडा उठाएर थालेपछि ट्राफिक प्रहरीले ६ वटा बसलाई जरिवाना गरेको छ । तोकिएको भन्दा दोब्बर भाडा तिर्ने यात्रुको रकम बसबाट फिर्ता गराइएको छ । काठमाडौं, बुटवललगायत सहरबाट सार्वजनिक सवारीमा यात्रा गरेर आउने यात्रुसित गाडीवालाले मनपरी भाडा असुलेको व्यापक गुनासो आएपछि प्रहरीले सन्धिखर्कदेखि पत्थरकोटसम्म विभिन्न ठाउँमा जाँचलाई तीव्रता दिएको छ ।
सन्धिखर्क नगरपालिका ९ नौलापानीस्थित थेरवाङ जंगलमा रहेको सिँचाइ पोखरीमा २७ वटा बाँदर मृत भेटिएका छन् । जंगलको बीचमा रहेको पोखरीमा खसेर बाँदर डुबेका डिभिजन वन कार्यालयका फरेष्टर दिपक पाण्डेले बताए ।
केन्द्रीय राजनीतिमा उच्च पहुँच राख्ने नेताहरूको बाहुल्य रहेको रूपन्देहीमा उम्मेदवार टुंगो नलागे पनि चुनावी गतिविधि बढ्न थालेका छन् । दैनिक पार्टी प्रवेश र प्रचारात्मक कार्यक्रम चलिरहेका छन् । उम्मेदवार तय नभए पनि सम्भावित उम्मेदवार उद्घाटन, शिलान्यास, छलफल र घरदैलोमा कुदिरहेका छन् । ‘हेभिवेट’ उम्मेदवारलाई विरासत जोगाउने र भत्काउने चिन्ता छ ।
उपसभामुख पुष्पा भुसाल गौतमले नेपाल एकीकरण गर्दा खाँचीकोट राज्यको भूमिका महत्त्वपूर्ण रहेको बताउँदै खाँचीकोट दरबारलाई राम्रो पर्यटकीय गन्तव्य बनाउनुपर्ने बताएकी छन् । नेपाल एकीकरणको इतिहासमा खाँची राज्यकी राजकुमारी चन्द्रप्रभावती (पृथ्वीनारायण शाहकी जेठी मुमा)कै शिक्षा र राजकीय रणकौशलबाट नेपाल एकीकरण भएको भन्दै उनले यस क्षेत्रलाई पर्यटकीय गन्तव्य बनाउनुपर्ने बताएकी हुन् ।
अर्घाखाँचीको शितगंगा नगरपालिका–३ ठाडामा ५३ वर्षीय एक पुरुष आफ्नै श्रीमतीको हत्या गरेको आरोपमा पक्राउ परेका छन् । ठाडाका पिताम्बर भुसालले ५० वर्षीय श्रीमती मनकला भुसालको हत्या गरेको प्रहरीको प्रारम्भिक अनुसन्धानबाट खुलेको बताइएको छ ।
एमाले अर्घाखाँचीले संघीय सांसदको उम्मेदवारमा टोपबहादुर रायमाझी, प्रदेशसभा (क) मा चेतनारायण आचार्य र (ख) मा रामजीप्रसाद घिमिरेलाई एकल सिफारिस गरेपछि नेताहरू कार्यकर्ता तथा मतदाता भेटघाट गरिरहेका छन् । पालिका स्तरमा पार्टी कार्यकर्ता चुनावी भेटघाट गर्दै कसरी चुनाव जित्न सकिन्छ भन्दै सुझाव संकलनमा लागेका छन् । उनीहरूले आगामी चुनावमा विकासका एजेण्डा बनाउन गाउँका मतदातासित पनि छलफलमा जुटेका छन् । स्थानीय तहमा राम्रो परिणाम आएपछि यहाँ एमाले उत्साहित छ ।
