अर्घाखाँची — डिभिजन वन कार्यालय अर्घाखाँचीले डढेलो नियन्त्रण गर्ने प्रचारात्मक सामाग्रीसहितको ‘टिकटक’ लाई पुरस्कृत गर्ने भएको छ । 'टिकटक'मार्फत नागरिकमा सचेतना अभिवृद्धि गर्ने उत्कृष्ट ३ जनालाई कार्यालयले पुरस्कार दिने घोषणा गरेको हो ।

बस्ती, वनपाखामा आगलागीको जोखिम नियन्त्रण गर्न सर्वसाधारणलाई एक मिनेटको टिकटक बनाउन वन कार्यालयले सूचना जारी गरेको छ । डढेलो नियन्त्रण तथा यसको प्रचार, कानुनी प्रावधान र यससम्बन्धी नागरिक सचेतना जस्ता विषयमा आधारित रहेर एक मिनेटको टिकटक भिडियो बनाउन कार्यालयले अपिल गरेको हो ।

उक्त भिडियो आफ्नो फेसबुक, टिकटक, युट्युब एकाउन्ट (च्यानल)मा राख्न र २५ चैतसम्म कार्यालयको इमेल ठेगाना डिएफओअर्घाखाँचीएटजिमेलडटकममा पठाउन भनिएको छ ।

३० चैतसम्म सबैभन्दा बढी ‘भ्युअर्स’ भएका उत्कृष्ट ३ भिडियो छनोट गरी पुरस्कृत गरिने कार्यालयका सूचना अधिकारी केशर खड्काले बताए । कार्यालयले प्रथम हुने टिकटकलाई १५ हजार, दोस्रोलाई १० हजार र तेस्रो हुनेलाई ५ हजार रुपैयाँ दिने जनाएको छ । 

खड्काका अनुसार टिकटक बनाउँदा डढेलो नियन्त्रण तथा व्यवस्थापन, संवाद र सन्देशमुलक, मौलिक अडियोभिडियोलाई प्राथमिकता दिने जनाएको छ । 

कार्यालयले अघिल्लो वर्ष समुदायबाट पातपतिंगर संकलन, जिल्लाका ६१ वडाभित्र रहेको डढलो जोखिम क्षेत्रका गाउँमा दुईजना गन्धर्व लगेर सारंगी बजाएर सन्देश प्रवाह गरेको थियो ।