लमजुङमा आगलागी हुँदा १३ वटा बाख्रा मरे

प्रहरीका अनुसार आगलागीमा परेर ६ वटा माउ बाख्रा, एउटा बोका, एउटा खसी र ३ वटा पाठापाठी मरेको जिल्ला प्रहरी कार्यालयका सूचना अधिकारी प्रहरी निरीक्षक थानेश्वर चपाईंले बताए । आगलागीबाट धन्सार समेत जलेको छ । बाख्रा र धन्सार जल्दा ५ लाख रुपैयाँ बराबरको क्षति भएको प्रहरीले बताएको छ ।

मध्यनेपाल नगरपालिका १० का वडाअध्यक्ष महेशकुमार पाण्डेले रुपबहादुर कुँवरपरिवार बिहानपख कुँडो बसालेर सुतेको र निदाएको समयमा हावाले आगो उडाएर धन्सारमा आगलागी भएको अनुमान गरिएको बताए । उनका अनुसार १३ वटा बाख्रा मर्नुका साथै एउटा माउ भैंसीसमेत घाइते भएको छ ।

छिमेकी सुमन ढकालका अनुसार रुपबहादुरले १४ वटा बाख्रा पाल्दै आएकोमा एउटामात्रै पाठी घाइते अवस्थामा बाँकी छ । माउ बाख्राहरू प्रायः गर्भिणी रहेको र आगलागीबाट सबै मरेको उनले बताए ।