बजेट कसका लागि ?

विगतका वर्षमा कहींकतै त महिलाको बजेट पनि बाटो र चौतारोमा हालियो । स्कुले बच्चाका नाममा आएको दिवा खाजाको रकमबाट शिक्षकले तलब खाए । तर दिनभरि काम गरी साँझ एक पोका नुन किनेर घर फर्किने सीमान्तकृतका लागि बजेटमा सम्बोधन भएन । दैनिक बढिरहेको महँगीको चपेटामा गरिब पनि परिरहेकै छन् । तर उनीहरूका लागि न राज्य छ न राज्यको बजेट काम लाग्छ ।

गाउँ–गाउँमा सिंहदरबार पुग्यो भन्छन् । तर यहाँका बादी, कुसबन्दिया, चिडिमार, घरियारा, दलित, मधेशी, मुस्लिम, भूमिहीन सुकुम्बासी र फरक क्षमता भएका समुदायका लागि बजेट देखिँदैन । अहिले स्थानीय तहको होस् या संघ, पार्टी र कार्यकर्ता हेरेर बजेट बनाइन्छ । आफ्ना दलका ठेकेदारले पेस गरेको योजनाका आधारमा बजेट बन्छ ।

माथिदेखि तलसम्म बजेटको लुछाचुँडीमा यही देखिन्छ । बजेट दलमुखी, नेतामुखी भएको र बजेटको किताव नै च्यातेको दृश्य पनि नदेखेका होइनौं । खासमा बजेट देश र जनताका लागि हुनुपर्ने होइन र ? हामीले हाम्रा लागि बजेट बन्यो, नीति तथा कार्यक्रम बन्यो भनेर खुसी हुने दिन कहिले आउँछ ?
– विष्णु रोका, नेपालगन्ज, बाँके