कर्णाली करिडोरमा जोडिदै सिमकोट

'हामीले जिम्मा लिएको कर्णाली करिडोर सडक अन्तर्गत हुम्लाको दुल्ली कुनादेखि लालीबगर सम्मको ८ किलोमिटरमध्ये छारेदेखि ल्याप्चेसम्मको ८ सय मिटर मात्र बाँकी छ, अरु काम पूरा भइसकेको छ,' कर्णाली करिडोर सडक निर्माण कार्यदलका सेनानी अमृत पराजुलीले भने ।

उनका अनुसार अहिले उक्त ८ सय मिटर खण्डमा धमाधम बलाष्टिङ गर्ने काम भइरहेको छ । यो काम पनि चालु आर्थिक वर्षभित्रै सम्पन्न हुने र हस्तान्त्रण गरिने उनले बताए । ८ सय मिटर सडकको काम सम्पन्न भएपछि कर्णाली करिडोर हुम्लाको सिमकोटसँग जोडिनेछ ।

सिमकोटमात्रै नेपालको त्यस्तो जिल्ला सदरमुकाम हो, जहाँ अहिलेसम्म पनि सडक पुगेको छैन । तर बाँकी रहेको ८ सय मिटर सडक बनेपछि सिमकोट पनि सडक सञ्जालमा जोडिनेछ ।

कालिकोट खुलालुदेखि हुम्ला सरिसल्ला सम्मको १ सय २२ किलोमिटर सडक सेनाले गत वर्ष नै काम सम्पन्न गरी हस्तान्त्रण गरिसकेको छ । अहिले कालिकोट खुलालुदेखि हुम्ला सरिसल्ला हुँदै दुल्ली, ल्याप्चेसम्म सवारी साधन ओहोर दोहोर गर्दै आएको छन् ।

पहिले कालिकोट खुलालुदेखि सरिसल्लासम्म सवारी साधन आउजाउ गर्दै आएका थिए भने सरिसल्लामा बेलिब्रिज निर्माण भएपछि माथि ल्याप्चे सम्म सवारी साधन पुग्ने गरेका छन् ।