सुनकोसीको गाउँसभा अझै अन्योलमा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
सिन्धुपाल्चोक — आन्तरिक विवाद र असन्तुष्टिका कारण जिल्लाको सुनकोसी गाउँपालिकाको चौथो गाउँसभा अझै हुन सकेको छैन । असार १० गते हुनुपर्ने गाउँसभा अझै अनिश्चित रहेको उपाध्यक्ष कान्छी लामाले बताइन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![सुनकोसीको गाउँसभा अझै अन्योलमा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/e51aac2a-7136-4182-ac8b-e15d86f60da7-2962024015753-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
यसअघि असार १० मा सुनकोसी गापाको गाउँसभा राखिएको थियो । जसमा प्रस्तुत नीति तथा कार्यक्रम र बजेटमा एक पक्षीय ढंगले गरिएको आरोप लगाउँदै उपाध्यक्षसहित ३१ जना कार्यपालिका सदस्य अनुपस्थित भएका थिए । गाउँसभा राखिए पनि बहुमत कार्यपालिका सदस्यहरु नआएपछि गाउँसभा सम्पन्न हुन सकेको थिएन ।
चौथो गाउँसभा अधिवेशनमा गणपुरक संख्या नपुगेर स्थगित गरेको र असार २६ मा सारिएको भन्दै सुनकोसी गापाले त्यही दिन सूचना जारी गरेको छ । यसबारे आफूसहित सबै जनप्रतिनिधिलाई थाह नभएको उपाध्यक्ष लामाले बताइन् । 'गाउँसभा असार २६ गते सारिएको सूचना फेसबुकको भित्ताबाट थाहा पाएँ, गापा अध्यक्षले आफ्नो एकलौटी गरिरहनुभएको छ, उहाँ अमुक पक्षबाट परिचालित हुनुहुन्छ,' उपाध्यक्ष लामाले भनिन् ।
सुनकोसी गाउँपालिका अध्यक्ष टपिन्द्रप्रसाद तिमिल्सिना यतिबला चीनमा छन् । अध्यक्षले आफूलाई कार्यवाहक दिएर निजी कामका लागि चीनमा गएको उपाध्यक्ष लामाले बताइन् ।
जिल्लाको ३ नगर र ८ गाउँपालिकाले निर्धारित समयमै नीति तथा कार्यक्रम र बजेट ल्याइसकेका छन् । स्थानीय सरकार सञ्चालन ऐन, २०७४ र अन्तर सरकारी वित्त व्यवस्थापन ऐन, ०७४ को व्यवस्थाअनुरुप पालिकाले प्रत्येक वर्ष असार १० गतेभित्र आर्थिक वर्षका नीति तथा कार्यक्रम प्रस्तुत गर्नुपर्ने व्यवस्था छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)