धागोबाट चुँडिनुअघिको चंगालाई
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
जाऊ त्यो इन्द्रेणीसम्म
बादलको गुफाभित्र पस
घामका रेशाहरु पहिल्याउँदै–पहिल्याउँदै
मन र शरीर भेदेर निराकारसम्म पुगेर आऊ
![](https://assets-cdn.ekantipur.com/uploads/source/ads/ekantipur-1-1282024082932.gif)
![धागोबाट चुँडिनुअघिको चंगालाई](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/changa-11-1022024034407-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
नबिर्सनु फर्कने बाटो
धागोले सुस्तरी–सुस्तरी तान्दा
तिमी उसकै चाल समातेर ओर्लिनुपर्छ
सुन !
चंगाले चंगा भइरहन धागोसँगै बाँधिइरहनुपर्छ
छुस्स छोइदिँदा च्यातिने नरम झिल्लीजस्तै
त्यो कागजको पातलो पाना
स्यााठ र सिरेटो झेल्दै
विराट आकाशमा नाचिरहन्छु भन्छ
छेडेर अझै माऽऽऽथि तारासम्म पुग्छु भन्छ
तर, धागोबिना चंगाको तृष्णा के अर्थ !
बादलको झोक्काले काँप्ने
पानीका बुँदहरुले गलाइदिने चंगा
निस्फिक्री नाच्न र बेपर्वाह उड्न
मसिनो त्यही रेशा चाहिन्छ
आखिर मनजस्तो न हो चंगा पनि !
रुख अड्याउन जराजस्तै
ढुंगा पगाल्न पानीजस्तै
मलाई तिम्रा पखेटाजस्तै
चंगालाई पनि त धागो नै चाहिन्छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)
प्रतिक्रिया