करको दर धेरै हुँदा मुद्रण उद्योग धराशायी भयो : अध्यक्ष तिवारी

‘कागज तथा कच्चा पदार्थमा भन्सार महसुल १५ प्रतिशत र भ्याट १३ प्रतिशत गरी २८ प्रतिशत कर लाग्ने सरकारको व्यवस्थाले स्वदेशी मुद्रण उद्योगलाई धराशायी बन्दै गइरहेका छन्,’ महासंघ केन्द्रीय अध्यक्ष विष्णु तिवारीले भने । सरकारको गलत नीतिका कारण चार हजार मुद्रण व्यवसायी र करिब ९० हजार कामदारलाई समस्या परिरहेको औंल्याएको उनको भनाइ छ ।

व्यवसायीले विदेशमा मुद्रण गरी नेपालभित्र आयात गरिने पुस्तक, औद्योगिक लेबल तथा प्याकेजिङ सामग्रीहरूमा कर छुट तथा न्यून कर लिँदा स्वदेशी उद्योग मारमा परेको बताए । ‘स्वदेशी मुद्रण उद्योगलाई धेरै कर लगाउँदा विदेशीसँग प्रतिस्पर्धा गर्न नसकेर हाम्रा उद्योगहरु धराशायी बन्न थालेका छन्,’ तिवारीले भने ।

पछिल्लो दश महिनाको तथ्यांकअनुसार चार अर्ब ८ करोड रुपैयाँ छपाइजन्य सामग्री विदेशबाट आयात हुँदा ४ करोड ३८ लाख रुपैयाँबराबरको निर्यात भएको उनीहरूको दाबी छ । व्यवसायीले आज सार्वजनिक हुने बजेटमा सम्बोधन गर्न सरकारलाई ११ बुँदे ध्यानाकर्षण पत्रसमेत बुझाएको बताए ।