नगर अस्पतालले उपचारमा सहज
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
बागलुङ — यहाँको गलकोट नगरपालिका गठन भएको आठ वर्ष भयो । गाउँका बजार मिलाएर बनेको नगरपालिकामा दुई वर्षअघि नगर अस्पताल संचालनमा आएको छ ।नामाकरण ४ वर्षअघि भए पनि दुई जना डाक्टरसहित स्वास्थ्यकर्मी राखेर अस्पताल संचालनमा आएको दोस्रो वर्षमा ३० हजार जनाले उपचार गराएका छन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![नगर अस्पतालले उपचारमा सहज](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/miscellaneous/birami-2572024044725-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
आर्थिक बर्ष २०८०/०८१ मा मात्रै ३० हजार १ सय बिरामीले उपचार गरेको अस्पताल प्रमुख डा. राजेश पौडेलले बताए ।
अस्पताल संचालनको पहिलो वर्ष यहाँ झण्ढै १० हजार हाराहारीले उपचार लिएका थिए । यहाँ भिडियो एक्सरे, ल्याब, ओपिडी, सुरक्षित सुत्केरी सेवा, पोष्टमार्टमलगायतको सेवा संचालनमा आएपछि सेवाग्राही बढेका हुन् । यहाँ एमजिडिपीसहित दुई डाक्टरको व्यवस्था गरिएपछि स्थानीयले गलकोटमै उपचार सेवा पाएका हुन् । घरछेवैमा उपचार पाउँदा अस्पतालमा सयौं बिरामी आउने गरेका हुन् ।
सदरमुकामको धौलागिरि अस्पताल पछि यो नगर अस्पतालमा धेरै बिरामीको उपचार हुने गरेको हो । अस्पतालले सेवा प्रवाहमा डिजिटल प्रविधिको थालनी समेत गरिसकेको छ । अस्पतालमा उपचारसेवा गुणस्तरीय भएकोले गलकोट नगरसहित ताराखोला, बडिगाड, ढोरपाटन, निसीखोला र तमानलगायत छिमेकी गुल्मीको मुसिकोटका बासिन्दा पनि सेवा लिने गरेका छन् ।
अस्पतालका अनुसार एक वर्षमा यहाँका १२ हजार १ सय ३३ जनाले ल्याब सेवा पाएका छन् । ४ हजार ५८ जनाले एक्सरे, १ सय ८५ जनाले दन्त सेवा, १ सय १ जनाले निशुल्क एम्बुलेन्स र १ हजार ५५ जनाले बिपन्न उपचार सेवा पाएका थिए ।
अस्पतालले हरेक दिन आउने बिरामीको रोगको प्रकृति समेत देखिने गरी डिजिटल बिधि पनि अपनाएको छ । टिकट काट्ने बित्तिकै बिरामीको विवरण र रोगको प्रकृति अनलाइनमा प्रविष्ट गरिन्छ । नगरपालिकाले पनि सबै वडाका स्वास्थ्य चौकीबाट अनलाइन डाटा संकलन गर्छ । यसरी संकलित डाटा नगरले अद्यावधिक गर्दा तथ्यांक संकलन सहज भएको छ । त्यसबाहेक औषधिको व्यवस्थापनलाई पनि चुस्त बनाउन सकिएको अस्पतालका प्रमुख डा. राजेश पौडेलले बताए ।
यहाँ औषधि बिक्री तथा टिकट शुल्क पनि अनलाइन बिलबाट तिरिन्छ । धौलागिरि अस्पतालले समेत गर्न नसकेको पद्दति गलकोट नगरअस्पतालले सुरु गरेको हो । यो पद्दतिले काम छिटो, पारदर्शी र व्यवस्थित बनेको नगर स्वास्थ्य शाखाका प्रमुख सुशील पौडेलले बताए ।
भिडियो एक्सरे, सुरक्षित सुत्केरी सेवा, एम्बुलेन्स सेवा, आँखा उपचार, इमरजेन्सीसहित १५ शय्याको व्यवस्थापन भएपछि अस्पतालमा बिरामी आउने क्रम पनि बढेको हो । सामान्य समस्या पर्दा सदरमुकाम धाउनुपर्नेहरुले नगर अस्पतालबाट सेवा सहजै लिन सकेको बताए । ‘सानो समस्या पर्नासाथ सदरमुकाम जानुपर्थ्यो,’ गलकोट–५ का तुलसी निउरेले भने, ‘अब त घरछेवैमा सुबिधा सम्पन्न अस्पताल बनेको सजिलो भयो ।’ निजी क्लिनिकमा जानुपर्ने बाध्यता भएकाहरु पनि अस्पतालबाट सेवा पाएकोमा खुसी छन् ।
नियमित डाक्टर बस्दा यहा पोष्टमार्टम सेवाबाट धेरैले राहत पाएका छन् । अस्पतालको तथ्यांकमा गत आर्थिक बर्ष मात्रै यहाँ २७ वटा पोष्टमार्टम भएका हुन् । पोष्टमार्टमकालागि सदरमुकाम जानुपर्दा ५० हजार बढी खर्च लाग्ने बाध्यता हटेको हो । नगरपालिकाले मध्यपहाडी लोकमार्गको हटियाबजारदेखि अस्पतालसम्मको ५ किमी सडक स्तरीय बनाएको छ ।
एमडिजीपी डाक्टर राजेश पौडेलले अस्पतालमा अपरेशन सेवा पनि संचालनको तयारी गरेको बताए । नगरपालिका र जापानमा बस्ने गलकोटबासीले लाखौं सहयोग गरेपछि आवश्यक उपकरणले अस्पतालको सेवा पनि चुस्त भएको हो ।
![](https://assets-cdn.ekantipur.com/uploads/source/ads/900-x-100-1-0282024055738.gif)