![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
हेटौंडा — हेटौंडा उपमहानगरपालिका–५ लटिनाथका एक दम्पती आफ्नै घरमा मृत अवस्थामा फेला परेका छन् । हेटौंडा बजार नजिकै रहेको लटिनाथ चिसापानीका ६२ वर्षीय केशव भण्डारी र श्रीमती ५६ वर्षीया अम्बिका भण्डारी बुधबार मृत अवस्थामा फेला परेका हुन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![आफ्नै घरमा मृत अवस्थामा दम्पती फेला](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/suicide-2572024050646-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
केशव पंखा झुन्ड्याउने फलामको हुकमा नाइलनको डोरीको पासो लगाइ झुन्डिएको अवस्थामा र अम्बिकाको घाँटीमा धारिलो हतियार प्रहारबाट हत्या गरिएको अवस्थामा प्रहरीले फेला पारेको थियो । स्थानीय एक महिलाले मृतक अम्बिकालाई मोबाइलमा फोन गर्दा नउठाएकाे र घर पुग्दा ढोका लगाएको देखेपछि प्रहरीलाई खबर गरेकी थिइन् । उनको खबरपश्चात प्रहरी पुगेर ढोका फोडेर हेर्दा केशव झुन्डिएको अवस्थामा र अम्बिका भुइँमा रगताम्मे अवस्थामा प्रहरीले फेला परेको थियो ।
केशवले पत्नीको हत्या गरेर आफू झुन्डिएको हुन सक्ने प्रहरीले प्रारम्भिक अनुमान गरेको छ । उक्त घरमा छोरा बुहारी अर्को कोठामा बस्थे, तर दिउँसो उनीहरू थिएनन् । झुन्डिएका पति र पत्नीको शव एउटै कोठामा थियो । छोराबुहारी र आमाबुबा एउटै घरमा बसे पनि अलगअलग भात पकाएर खाने गर्थे । विगत ४ महिनादेखि भण्डारीले डिप्रेसनको औषधि खाँदै आएका थिए ।
भुइँमा रहेको रगत अम्बिकाको हो की होइन भनेर अनुसन्धानका लागि काठमान्डौंस्थित प्रयोगशालामा पठाइएको प्रहरी उपरीक्षक रिजालले जनाए । ‘हामी थप अनुसन्धान गरिरहेका छौ,’ उनले भने ।
गत वर्ष हेटौंडा उपमहानगरपालिका–१ का एक वृद्धवृद्धा आफनै घरमा झुन्डिएर आत्महत्या गरेका थिए । मकवानपुरमा आत्महत्याको घटना बर्सेनि बढ्दो छ । जिल्ला प्रहरी कार्यालय मकवानपुरका अनुसार गत आवमा ५२ जना महिलासहित १ सय ४४ जनाले आत्महत्या गरेका थिए । अघिल्लो आर्थिक वर्ष १ सय २५ जनाले आत्महत्या गरेका थिए । अघिल्लो आर्थिक वर्षकाे तुलनामा गत वर्ष २१ जना बढीले आत्महत्या गरेका छन् ।
![](https://assets-cdn.ekantipur.com/uploads/source/ads/900-x-100-1-0282024055738.gif)