युरो २०२४, प्लेयर टु वाच : डोमिनिक सोबोस्लाई

हंगेरीको फुटबलले पाएका पछिल्ला स्टार खेलाडी हुन्, डोमिनिक सोबोस्लाई । इंग्लिस प्रिमियर लिग क्लब लिभरपुलका लागि व्यवसायिक खेल खेल्ने उनी भर्खर २३ वर्षका भए । उनी यस युरोमा सबैभन्दा कान्छा कप्तान समेत हुन् । उनकै खेलको वरीपरी पूरा हंगेरी टिम रहने गर्छ । मिडफिल्डरका रूपमा सबै खाले भूमिका निभाउन सक्षम छन् । सन् २०२० को युरो भने उनले चोटका कारण गुमाएका थिए । उनको अनुपस्थितिमा फ्रान्स र जर्मनी जस्ता हेभिवेटविरुद्धको खेल बराबरीमा टुंगेको थियो ।

यसै कारण टिम चाँडै घर फर्किन बाध्य रह्यो । यही एक कारणले पनि साबोस्लाई यसपल्ट राम्रो प्रदर्शनका लागि प्रेरित छन् । उनी भन्छन्, ‘हामी सक्दो टाढा जान चाहन्छौं । टिमबीच गज्जबको एकता छ । हामी प्रतियोगितामा ठूलो उत्साहले उत्रिरहेका छौं, किनभने हामीलाई गुमाउनु पनि केही छैन् ।’ लिभरपुल आउन अगाडि उनी आरबी लाइपगिजका लागि खेलेका थिए र त्यस अर्थमा उनलाई जर्मनीमा खेलेको पनि राम्रो अनुभव छ ।