मन्त्री हाबी हुने बजेट बनाउन बन्द गरौँ : प्रमुख सचेतक परियार

प्रतिनिधिसभाको मंगलबारको बैठकमा प्रमुख सचेतक परियारले बजेटको समन्यायिक वितरण हुनुपर्ने बताए । उनले अमूक मन्त्री हाबी हुने बजेट बनाउन बन्द गर्नुपर्ने बताए । उनले सबै निर्वाचन क्षेत्रमा निश्चित न्यूनतम बजेट जाने व्यवस्था गर्नुपर्ने धारणा राखे ।

'अब बजेट एउटा विधिमा बनाऔँ, एउटा पद्धतिमा बनाऔँ । यसलाई एउटा सुत्रमा बनाऔँ । समन्यायिक विकासको कुरा हामी सबै गर्छौं । तर समन्यायिक बजेट वितरण किन हुन सक्दैन ? अमूक मन्त्री हाबी हुने बजेट बनाउन अब हामी बन्द गरौँ । एउटा निश्चित मापदण्ड, निश्चित व्यवस्था त गर्न सकिन्छ होला नि त । कानुन तर्जुमा गर्न सकिन्छ होला नि त !,' परियारले भने, 'सरकारका मन्त्रीको विशेष प्राथमिकता होलान् । तर, कमसेकम हाम्रा सबै क्षेत्रमा, सबै भुगोल, सबै निर्वाचन क्षेत्रमा न्यूनतम यति बजेट जाने भन्ने कुरा त गर्न सकिन्छ होला नि ! त्यो खालको कार्यपद्धती बनाउन किन नसक्ने ? त्यो गर्न सकियो भने मात्रै बजेट, सरकारका माथि आएका टिकाटिप्पणी कम हुन्छ भन्ने मलाई लाग्छ । अन्यथा फेरि पनि बजेट माथि गर्ने बहस यस्तै रहन्छ ।’