बलात्कार आरोपमा दुई पक्राउ

बलात्कारको उद्योग आरोपमा प्रहरीले जिल्लाको बन्गाड कुपिण्डे नगरपालिका-१ देवस्थल बस्ने वर्ष २२ का मानबहादुर रावत र बसन्त बुढालाई पक्राउ गरेको हो । अर्का एक फरार रहेका छन् ।

जिल्ला प्रहरी कार्यालय सल्यानका सूचना अधिकारी प्रनि रेसमबहादुर खत्रीका अनुसार घरमा कोही नभएको मौका छोपी गत असार ३१ गते राति १२ बजे माइतीघरमा सुतिरहेकी युवतीलाई मानबहादुर रावत र बसन्त बुढाले बलात्कारको प्रयास गरेका थिए । नाम नखुलाइएका अर्का एकजनाले बरन्डाबाट तानी घिसार्दै घरदेखि ३० फिट टाढा पर्ने शौचालय नजिकैको खाली जग्गामा लगेर बलात्कार गरेका थिए ।

पक्राउ परेका दुई जनालाई जिल्ला अदालत सल्यानबाट म्याद थप गरी जिल्ला प्रहरी कार्यालय सल्यानको हिरासतमा राखेर अनुसन्धान भइरहेको र फरार प्रतिवादीको खोजी भइरहेको सूचना अधिकारी प्रनि खत्रीले जानकारी गराए ।