गाउॅमा आतंक फैलाएको चितुवा नियन्त्रणमा
बर्दिया — मधुवन नगरपालिकाको खाता जैविकमार्गमा आतंक फैलाउने चितुवा डिभिजन वन कार्यालयको समन्वयमा राष्ट्रिय प्रकृति संरक्षण कोष, बर्दियाले नियन्त्रणमा लिएको छ ।
प्रायःजसो दिनहुँ बस्तीमा पसेर बाख्रा, भेँडा लगायतका वस्तुभाउ खाने गरेको चितुवाका कारण आतंक मञ्चाउँदै आएको थियो ।
राष्ट्रिय प्रकृति संरक्षण कोष, बर्दियाका प्रमुख अजित तुम्फाहाम्बेले उक्त चितुवा डार्टबिना नियन्त्रणमा लिएको बताए । 'केही दिनअघि त्यहाँ क्यामेरा ट्यापसहित खोर राखिएको थियो,’ उनले भने, ‘खोरमा पसेपछि चितुवा नियन्त्रण आएको थियो ।'
उक्त चितुवालाई बर्दिया राष्ट्रिय निकुञ्जको बबई उपत्यकास्थित लामीदारा भन्ने ठाउॅमा बिहीबार छाडिएको छ । खाता जैविकमार्गमा दर्जन बढी चितुवा आउजाउ गर्ने गरेको अनुमान वन कर्मचारीको छ ।
प्रकाशित : मंसिर १४, २०८० १८:५८प्रतिक्रिया