कोहलपुरमा आगलागी हुँदा पसल जलेर नष्ट

इलाका प्रहरी कार्यालय कोहलपुरका प्रमुख प्रहरी नायब उपरीक्षक सुन्दर तिवारीका अनुसार घरधनी योगीको १० वटा कोठा भएको एक तले पक्की घरमा पाँच वटा सटरमा सञ्चालन गरिएका विभिन्न पसलहरूमा आगलागी भएको हो । तीमध्ये दिनेश शाहीले सञ्चालन गर्दै आएको उषा कस्मेटिक एन्ड सु सेन्टर (ब्युटिपार्लर) र करिश्मा टेलरिङ एन्ड ट्रेनिङ सेन्टरमा आगलागी भएको प्रहरीले जनाएको छ ।

क्रिष्टिना इम्पोरिएम एन्ड टेलरिङ सेन्टर, दीपिका पुस्तक पसल र चित्र कोट जनरल स्टोर पनि जलेर पूर्ण रूपमा नष्ट भएको प्रहरी प्रमुख तिवारीले बताए । उनका अनुसार पुराना तार सर्ट भएर क्रिष्टिना इम्पोरिएम एन्ड टेलरिङ सेन्टरबाट आगलागी भएको हो ।

स्थानीयबासी, नगर प्रहरी र इलाका प्रहरीका साथै नेपालगन्ज र बर्दियाको बाँसगढीबाट गएको दमकलले दुई घण्टाको प्रयासपछि आगो नियन्त्रणमा लिएको थियो । बुधबार बिहान पनि नेपालगन्जको बीपीचोकस्थित अफोज शेषले सञ्चालन गरेको जनता सिरक पसलमा आगलागी भएको थियो ।