भेरी अस्पतालमा जेठ १५ भित्रै ‘इमर्जेन्सी कक्ष’ पूर्णरुपमा सञ्चालन हुने

अहिलेको इमर्जेन्सी कक्षमा एमआरआई सेवा सञ्चालनको तयारी छ । चारतले नयाँ भवन अझै पूर्णरुपमा हस्तान्तरण हुन नसकेपछि ओपीडी सेवा आंशिक र आपत्कालीन सेवा पूर्ण रुपमा सञ्चालन गर्ने तयारी थालिएको हो ।

अस्पतालका प्रमुख मेडिकल सुपरिटेन्डेन्ट चापागाईंले हाल पुरानो भवनबाट सेवा प्रवाहमा कठिनाइ भएकाले नयाँ भवन हस्तान्तरण नभए पनि स्तरोन्नतिसहित इमर्जेन्सी वार्ड सञ्चालनको तयारी गरिएको बताए ।

‘जेठ १५ भित्र नयाँ भवनबाट इमर्जेन्सी वार्ड पूर्णरुपमा सञ्चालन गर्ने तयारी छ । अब सञ्चालन गरिँदा पूर्ण रुपमा सुविधासम्पन्न शय्याको व्यवस्था गरिएका छन्‚’ डा. चापागाईंले भने, ‘इमर्जेन्सी कक्ष हाल १६ शय्याको रहेकोमा ३० शय्याको हुनेछ ।’

भेरी अस्पतालमा १५० शय्याको स्वीकृति भए पनि पुरानो भवनबाट १६२ शय्यामा बिरामीको उपचार भइरहेको छ ।

भेरी अस्पतालमा निर्माण भइरहेको ओपीडी भवन निर्माण सम्पन्न भएर हस्तान्तरण भएपछि उक्त अस्पताल करिब पाँच सय शय्या क्षमताको हुने बताइएको छ ।