काठमाडौँ — बुटबलको गार्गी एकेडेमीका रितिम गुरुङ र आदर्श विद्या मन्दिर (एभीएम) की आस्मा पहारीले नवौं सोफेस राष्ट्रिय अन्तरविद्यालय टेबलटेनिस प्रतियोगितामा स्वर्ण पदक जितेका छन् । ब्वाइजमा रितिम र गर्ल्समा आस्मा विजेता भए ।
शारीरिक शिक्षा तथा खेलकुद समाज (सोफेस) नेपालद्वारा आयोजित प्रतियोगिताको ब्वाइज सिंगल्स फाइनलमा रितिमले दरबार हाइस्कुलका शंकर पहारीलाई ११–९, ११–८, १३–११ को सोझो सेटमा हराए । मोर्डन इन्डियन स्कुल (एमआईएस) विशाल थापा र एभरेस्टका आर्यन शाही तेस्रो भए ।
स्वर्णिम स्कुलको संयोजन तथा कन्सेप्ट मेकर्जको व्यवस्थापनमा भएको प्रतियोगिताको गर्ल्स सिंगल्समा आस्माले सेन्ट मेरिजकी सुरम्या शाक्यलाई ११–६, ११–६ र ११–८ ले हराइन् । एभीएमकी अर्सना महर्जन र न्यु सुम्निमाकी अंकिता वज्राचार्य संयुक्त तेस्रो भए । दुवैका विजेताले १५ हजार, दोस्रोले ७ हजार ५ सय तथा तेस्रोले ३–३ हजार नगद पुरस्कार पाए ।
लैनचौरस्थित राष्ट्रिय टेबलटेनिस प्रशिक्षण केन्द्रमा ब्वाइज टिम इभेन्ट फाइनलमा गार्गी एकेडेमी च्याम्पियन भयो । गार्गीले फाइनलमा भासरा माविलाई ३–१ ले हरायो । एमआईएस र न्यु होराइजन तेस्रो बने । गर्ल्स फाइनलमा एभीएमले प्रभातलाई ३–० ले हराएर स्वर्ण जित्यो । स्वस्तिश्री गुरुकुल र भासरा तेस्रो भए ।
विजेतालाई अखिल नेपाल टेबलटेनिस संघका अध्यक्ष चतुरानन्द राजवैद्य, प्रथम उपाध्यक्ष धर्ममान वज्राचार्य, सोफेसका अध्यक्ष रामकृष्ण महर्जन, स्वर्णिम स्कुलका प्रिन्सिपल सहजी पन्त, कन्सेप्ट मेकर्जका प्रबन्ध निर्देशक प्रशान्त महर्जनलगायतले पुरस्कृत गरे । प्रतियोगिताको १० औं संस्करण बुटवलमा गरिने छ ।
प्रकाशित : जेष्ठ ५, २०८० १९:४४
