दाङ — घोराहीस्थित महेन्द्र बहुमुखी क्याम्पसको स्ववियु निर्वाचनमा एक जना सदस्य बाहेक नेविसंघको प्यानल विजयी भएको छ । नेपाल विद्यार्थी संघका मनोज डिसी १ हजार ९६ मत प्राप्त गर्दै स्ववियु सभापतिमा विजयी भएको निर्वाचन अधिकृत कुलविर चौधरीले जानकारी दिए ।
अखिल संयुक्तका उम्मेदवार हिमाल महराले ६ सय २० मत प्राप्त गरेका छन् । एमाले निकट अनेरास्ववियु, माओवादी निकट अखिल क्रान्तिकारी र राष्ट्रिय जनमोर्चा निकट अखिल छैठौंले तालमेल गरेका थिए । त्यस्तै, नेविसंघ र एकीकृत समाजवादी निकट अनेरास्ववियुले तालमेल गरेका थिए ।
सभापतिमा नेत्रविक्रम चन्द निकट अखिल क्रान्तिकारीका खुमबहादुर केसीले १ सय २४, राष्ट्रिय प्रजातान्त्रिक विद्यार्थी संगठनका मुस्कान पोख्रेलले २८, स्वतन्त्र विद्यार्थी समूहका अभिषेक विष्टले १ सय ३० र अनेरास्ववियु छैठौँ (क्रान्तिकारी)का सेवक भट्टराईले ४५ मत प्राप्त गरेका छन् ।
सचिवमा ९ सय ५५ मत प्राप्त गर्दै नेविसंघका बसन्त भण्डारी विजयी भएका छन् । उनका प्रतिस्पर्धी अखिल संयुक्तका रविभक्त केसीले५ सय ८३ मत प्राप्त गरेका छन् ।
कोषाध्यक्षमा पनि नेविसंघकै ममता केसी ९ सय ९६ मतका साथ विजयी भएकी छन् भने अखिल संयुक्तका सागर पण्डितले ६ सय ९४मत प्राप्त गरेका छन् ।
सदस्यमा नेविसंघका बसन्त कँडेल, सुरेश पोख्रेल, विवेक खनाल, जीवन डिसी, अनिषकुमार चौधरी, रमिला चौधरी, पुष्पकमल दाहाल र अनेरास्वीयुका सविन पोख्रेल विजयी भएका छन् । चैतको ५ गते स्वतन्त्र विद्यार्थी युनियनको निर्वाचन गर्ने कार्यतालिका रहे पनि नेत्रविक्रम चन्द निकट अखिल क्रान्तिकारीले गरेको तालाबन्दीका कारण चैत ८ गते निर्वाचन भएको थियो ।
प्रकाशित : चैत्र ९, २०७९ १०:२५
