दाङका ४ क्याम्पसमा मात्रै स्ववियु निर्वाचन सुरू

केन्द्रीय आयुर्वेद विद्यापिठ बेलझुण्डी, देउखुरी बहुमुखी क्याम्पस लमही, जनता बहुमुखी क्याम्पस गढवा र ऐरावती आदर्श बहुमुखी क्याम्पस लालमटीयामा बिहान ८ बजेदेखि मतदान सुरु भएको उनले जानकारी दिए । आयुर्वेद विद्यापिठमा १९७, देउखुरी बहुमुखीमा १११९, जनता बहुमुखीमा १७९ र ऐरावती आदर्श बहुमुखी क्याम्पसमा ६७४ मतदाता रहेको वलीले बताए ।

महेन्द्र बहुमुखी क्याम्पस घोराही, विश्वविद्यालय विद्यापिठ बेलझुण्डी, जनता विद्यापिठ बिजौरी र राप्ती बबई क्याम्पस तुलसीपुरमा विभिन्न विद्यार्थी संगठनको तालाबन्दीका कारण निर्वाचन स्थगित भएको एसपी वलीले जानकारी दिए । तीमध्ये महेन्द्र बहुमुखी क्याम्पस घोराहीले चैत ८ मा निर्वाचन गर्ने निर्णय गरेको छ भने अन्य क्याम्पसमा अझै केही टुंगो लागेको छैन ।

पुरन्धारा बहुमुखी क्याम्पस हंशपुरमा भने सहमतिका आधारमा नेतृत्व चयन भएको छ । सहमतिबाट पूरै कार्यसमितिमा महिला चयन भएका छन् । नेपाल विद्यार्थी संघकी गोमा वली सभापति, अनेरास्ववियुकी गोमा केसी उपसभापति, अनेरास्ववियुकी कविता वली सचिव, अनेरास्ववियुकै अञ्जु केसी सहसचिव र अखिल क्रान्तिकारीकी भीमाकुमारी खड्का कोषाध्यक्षमा निर्विरोध निर्वाचित भएका छन् । सदस्यमा अनेरास्ववियुबाट हिरा वली, सञ्जु केसी, लक्ष्मी वली, नेविसंघबाट टीका वली, पूजा डाागी र स्वस्तिका घर्ती निर्वाचित भएका छन् ।

निजीमा सहमतिबाट नेतृत्व चयन, ३ मा महिला नेतृत्व

जिल्लाका १७ निजी क्याम्पसहरुमा भने सहमतिबाट नेतृत्व चयन भइरहेको छ । आठ क्याम्पसमा सहमतिका आधारमा नेतृत्व चयन भएको छ भने अन्य नौ क्याम्पसमा सहमतिको प्रयास भइरहेको छ । सहमति भएका आठमध्ये तीन क्याम्पसको नेतृत्व महिलाले गरेका छन् ।

सिद्धपृथ्वी जनता क्याम्पस श्रीगाउँमा पूरै टिम नै महिला निर्वाचित भएका छन् । सभापतिमा अनेरास्ववियुका आरती चलाउने, उपसभापतिमा नेविसंघका रम्भा चौधरी, सचिवमा अखिल क्रान्तिकारीका राधा चौधरी, सहसचिवमा अनेरास्ववियुका बालिका केसी र कोषाध्यक्षमा नेविसंघका आशावती चौधरी निर्वाचित भएका छन् । सदस्यहरूमा लालमती खड्का, यमुना कुमाल, मधु पुन, पूर्णिमा चौधरी र सुमित्रा कार्की चयन भएका छन् ।

घोराहीको स्पान नेशनल कलेजमा पनि महिला नेतृत्व चयन भएको छ । सभापतिमा अनेरास्ववियुकी सीता घर्ती मगर चयन भएकी छन् । उपसभापतिमा माओवादी केन्द्र निकट अखिल क्रान्तिकारीका रामबहादुर परियार र सचिवमा नेत्रविक्रम चन्द निकट अखिल क्रान्तिकारीका टार्जन क्षेत्री चयन भएका छन् । कोषाध्यक्ष र सहसचिवमा नेविसंघका निशा डाागी र भाग्यलक्ष्मी भण्डारी चयन भएका छन् । सदस्यमा पनि सबै संगठनले भागबण्डा गरेका छन् ।

यसैगरी तुलसीपुरको नोभेक्स इन्टरनेसनल कलेजमा पनि सहमतिबाट सभापतिमा अनेरास्ववियुका डिला शाही निर्वाचित भएकी छन् । अन्य क्याम्पसहरुमा सहमतिको प्रयास भइरहेको छ ।