अस्थिरता र संक्रमणकालको सबै दोष दल र नेतालाई दिनुहुन्न : मुख्यमन्त्री गिरी
बुटवल — लुम्बिनी प्रदेशका मुख्यमन्त्री लीला गिरीले अस्थिरता र संक्रमणकालको सबै दोष राजनीतिक दल र नेतालाई दिनु साटो त्यसको कारण खोज्न आग्रह गरेका छन् ।
उनले अस्थिर राजनीति र सरकारका कारण जनतामा निराशा बढेको बताउँदै लुम्बिनी प्रदेशको मुख्यमन्त्रीको हैसियतमा सकेसम्म अस्थिरता तोड्ने र प्रदेशको हितमा मात्रै काम गर्ने बताए ।
पत्रकार रामकृष्ण भण्डारीको ‘सत्ता संघर्ष’ नामक पुस्तकको शनिबार बुटवलमा आयोजित परिचर्चा कार्यक्रममा बोल्दै मुख्यमन्त्री गिरीले राजनीतिक इमान्दारितामा कोही चुक्न नहुने बताए । उनले व्यवस्था परिवर्तन भएपनि नागरिकको अवस्था परिवर्तन नभएको बताउँदै आफ्ना हरेक काम जनतालाई केन्द्रमा राखेर गर्ने बताए ।
पत्रकार भण्डारीको पुस्तकमा ३० वर्षमा २८ सरकार गठन र विघटनसम्बन्धी प्रमुख राजनीतिक घटनाको नालीबेली समेटिएको छ । सरकार बदल्नमै नेताको चासो देखिएपनि राष्ट्रहित र जनताको पक्षमा काम गर्छौं भन्ने कसैमा पनि सोच नभएका कारण सबैजसो सरकार टिक्न नसकेको विषय समेटिएको लेखक भण्डारी बताए । कृतिमा ०४६ को राजनीतिक परिवर्तनदेखि ०७४ को निर्वाचनबाट बनेका सरकार, राजनीतिक दाउपेच र सत्तासंघर्ष समेटिएको छ ।
भण्डारीले १० वर्षको मेहनेत लगाएर आफूले पुस्तक प्रकाशन गरेको भन्दै आफूले पत्रकारिताका दौरानमा देखेका, भोगेका, महसुस गरेका, अनुभव गरेका र विभिन्न नेता एवं व्यक्तिसँगको कुराकानीका आधारमा पुस्तक प्रकाशन गरेको बताए ।
