कुनै भवितव्य नभए अब छ महिनाभित्र भैरहवाको गौतमबुद्ध विमानस्थलबाट अन्तर्राष्ट्रिय उडान सुरु हुनेछ । लुम्बिनी आउने पर्यटकलाई सोझै बुद्ध जन्मस्थल ल्याउने प्रमुख उद्देश्यले यो विमानस्थल बनाइएको हो ।

ऊर्जा तथा जलस्रोतमन्त्री टोपबहादुर रायमाझीले एमसीसी लागू गर्ने/नगर्नेबारे तत्काल निर्णय गर्नुपर्ने बताएका छन् । रिपोर्टर्स क्लब लुम्बिनीले शुक्रबार बुटवलमा आयोजना गरेको साक्षात्कारमा उनले विद्युत् उत्पादन बढ्दै गएको तर विस्तार गर्न ट्रान्समिसन लाइन नभएकाले एमसीसीबारे निर्णय लिइहाल्नुपर्ने बताएका हुन् ।

युवालाई कृषि पेसाप्रति आकर्षित गर्ने र कृषिलाई उद्यम एवं व्यवसायमा जोड्ने भन्दै लुम्बिनी प्रदेशको भूमि व्यवस्था कृषि तथा सहकारी मन्त्रालयले हरित स्वयंसेवक नियुक्त गरेको छ । 

बुटवलमा सम्पन्न हाफ म्याराथन प्रतियोगिताको उपाधि खड्ग दल गण रोल्पाका शिवबहादुर रायमाझीले हात पारेका छन् । उनले १ घण्टा ११ मिनेट ४९ सेकेण्डमा २१ किलोमिटर दूरी  पूरा गर्दै उपाधि हात पारेका हुन् । 

नेकपा महासचिव विष्णु पौडेलले प्रतिनिधिसभा पुन:स्थापित हुने कुनै संवैधानिक र कानुनी आधार नभएको बताएका छन् । करिब ६४ प्रतिशत सांसदको साथ र दुई तिहाइ बहुमत प्राप्त प्रधानमन्त्रीले प्रतिनिधिसभा विघटन गरेकाले अब पुनर्स्थापित हुने सम्भावना नै नरहेको दाबी उनले गरे । उनले प्रचण्डसहितका नेता सडकमा जानु र संसद् पुन:स्थापनाको माग गर्नु हास्यास्पद रहेको बताए ।

अस्पतालभित्रै चिकित्सकमाथि हातपात हुँदा पनि बेवास्ता गरेको भन्दै लुम्बिनी प्रादेशिक अस्पताल बुटवलका चिकित्सक तथा स्वास्थ्यकर्मी विरोधमा उत्रिएका छन् ।

व्यापारिक केन्द्र बुटवलबाट बाहिरिने र बुटवल आउने ढुवानीका सामान धेरै हुन्छन् । बजार क्षेत्र र सडकमा छरिएर रहेका ढुवानीका साधन र व्यवसायलाई व्यवस्थित बनाउन यहाँ ढुवानी ग्राम निर्माण थालिएको हो । बुटवल उपमहानगरपालिकाले गुरुयोजना बनाएर गत वर्षदेखि बुटवल–१२ नयाँगाउँमा ग्राम निर्माण थालेको हो । जहाँ बुटवलबाट ढुवानी गर्ने र ढुवानी भएर आएका सामान एवं यातायात साधन राखिनेछ ।

कपिलवस्तुको कृष्णनगर नगरपालिकाकी उपप्रमुख सबनम खातुनलाई नगरको काम ‘फलामको च्युरा’ सरह बन्न पुग्यो । स्थानीय सरकार सञ्चालन ऐन २०७४ ले किटान गरेका अधिकार उपयोग गर्न खोज्दा उनलाई जनप्रतिनिधि मात्रै होइन, कर्मचारीले पनि साथ दिएनन् ।

राष्ट्रिय जनमोर्चाका अध्यक्ष चित्रबहादुर केसीले प्रधानमन्त्री केपी ओलीको सनकले देश भड्खालोमा परेको बताएका छन् । उनले पार्टीभित्रको विवाद मिलाउन नसक्दा प्रतिनिधिसभा नै विघटन गरेर देश भड्खालोमा पार्ने र संविधानमाथि धावा बोल्ने काम गरेको बताए । 

गत आर्थिक वर्ष लुम्बिनी प्रदेशमा लैंगिक हिंसाविरुद्धका ६२३ उजुरी प्रहरी हुँदै अदालतमा दर्ता भए । घरेलु हिंसाका १,८४४ उजुरी प्रहरीमै थामथुम पारिए । चालु आर्थिक वर्षको पहिलो चौमासिकमा मात्रै लैंगिक हिंसाका २८५ उजुरी प्रहरीमार्फत अदालत पुगेका छन् ।