नरैनापुर गाउँपालिकाद्वारा पञ्चे बाजा वितरण
नेपालगन्ज — पछिल्लो समय नयँ प्रविधि आविस्कारसँगै लोप हुँदै गएको पञ्चे बाजा संरक्षणका लागि नरैनापुर गाँउपालिकाले केही योजना अवलम्बन गरेको छ । शुक्रबार मात्रै गाउँपालिकाले एउटा समूहलाई बाजा वितरण गरेको छ ।
पछिल्लो समय नयाँ पुस्तामा पञ्चे बाजाप्रतिको रुची कम हुँदा बढी प्रचलित पञ्चे बाजा बजाउने संख्या घट्दै गएको देखेपछि पञ्चे बाजाको संरक्षण र यसका वाद्यवादकहरुलाई थप प्रोत्साहित गर्न नरैनापुर गाउँपालिका वडा नं. ६ को पञ्चे बाजा समूहलाई बाजा खरिद गरेर प्रदान गरिएको गाँउपालिका अध्यक्ष इश्तियाक अहमद शाहले बताए ।
पञ्चे बाजा समूह बिहे, ब्रतबन्धका साथै सुखद कार्यक्रममा शूभ कार्यका लागि बाजा बजाउने प्रचलन छ । पछिल्लो समय पञ्चे बाजा सांस्कृतिक, सामाजिक हिसाबले महत्त्वपूर्ण भए पनि बजाउनमा नयँ पुस्ताको चासो र इच्छाशक्ति नदेखिएकाले गाउँपालिकाले पञ्चे बाजा संरक्षणको योजना अघि सारेको हो ।
यसका लागि उक्त बाजा बजाउने समुदायलाई बाजा प्रदान गरेको नरैनापुर गाउँपालिकाका अध्यक्ष शाहको भनाइ थियो ।
प्रकाशित : माघ ६, २०७९ १९:५६
