मकैबारीमा मृत अवस्थामा भेटियो गैंडा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
चितवन — भरतपुर महानगरपालिका-२६ भगेडी गाउँको मकै बारीमा मंगलबार बिहान एउटा पोथी गैंडा मृत अवस्थामा भेटिएको छ । घटनास्थलमा निकुञ्जको टोली पुगेको छ । पशु चिकित्सकको टोली पुग्दैछ ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![मकैबारीमा मृत अवस्थामा भेटियो गैंडा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/gainda-2372024065618-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
चितवन राष्ट्रिय निकुञ्जका सूचना अधिकारी गणेशप्रसाद तिवारीले गैंडाको खाग र खुर सुरक्षित रहेको हुँदा चोरी तस्करीबाट नभइ अन्य कारणले मरेको हुन सक्ने बताए । 'बाह्य घाउचोट केही छैन । उमेर पनि भएको छ । सरसर्ती हेर्दा कुनै घटना दुर्घटना भएझैँ लाग्दैन । यद्यपि पशु चिकित्सकको टोलीले उमेर यकिन गर्न र शरीरभित्र केही भए/नभएको कारण पत्ता लगाउन पोस्टमार्टम गर्न बाँकी छ,' सूचना अधिकारी तिवारीले भने ।
विश्वबाट लोप हुने अवस्थामा पुगेको दुर्लभ वन्यजन्तु गैंडा नेपालभर ७५२ रहेको छ । यसमध्ये चितवन निकुञ्ज आसपासमा मात्रै ६९४ गैंडा छन् ।गत आर्थिक वर्षमा चितवन निकुञ्ज आसपासमा २१ गैंडा मरेको सूचना अधिकारी तिवारीले बताए । दुईवटा गैंडा चोरी तस्करीले खागका लागि मारेका थिए । तस्करहरूले गैंडाको खागका लागि गैंडा मार्दछन् ।
५० र ६० को दशकमा चितवनमा गैंडाको चोरी शिकार ठूलो समस्या थियो । पछिल्ला वर्षहरूमा चोरी शिकार कम हुँदै गए पनि विभिन्न घटना, दुर्घटना र अन्य प्राकृतिक कारणले गैंडाको मृत्युदर बढ्दो छ ।
गत आर्थिक वर्षमा मात्रै १८ वटा गैंडा मरे । दुर्लभ वन्यजीव गैंडालाई मारेमा, यसको अंग ओसारपसार र किनबेच गरेमा अधिकतम १० लाख रूपैयाँसम्म जरिवाना या १५ वर्षसम्म कैद वा कैद र जरिवाना दुवै हुने कानुनी व्यवस्था छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)