'नियतवश कुनै सञ्चारमाध्यमप्रति राज्यले हमला गर्नु र प्रतिशोध साँध्नु गलत'
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — नागरिक आन्दोलन, चितवनले नियतवश कुनै सञ्चारमाध्यमप्रति राज्यले हमला गर्नु र प्रतिशोध साँध्नु गलत र अलोकतान्त्रिक कदम भएको जनाएको छ ।
![](https://assets-cdn.ekantipur.com/uploads/source/ads/ekantipur-1-1282024082932.gif)
!['नियतवश कुनै सञ्चारमाध्यमप्रति राज्यले हमला गर्नु र प्रतिशोध साँध्नु गलत'](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/miscellaneous/thumb-1-2352024053457-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
आन्दोलन सम्बद्ध जीवन क्षेत्री, सरिता तिवारी र सुवास बस्नेतले बिहीबार विज्ञप्ति जारी गर्दै कसैले कुनै गल्ती गरेको भए त्यसको न्यायिक निरुपण हुनुपर्नेमा जोड दिएका हुन् । 'कानुनी राज भएको देशमा कसैले कुनै गल्ती गरेको भए त्यसको न्यायिक निरुपण हुनु एउटा कुरा हो । तर नियतवश कुनै सञ्चार माध्यमप्रति राज्यले हमला गर्नु र प्रतिशोध साँध्नु गलत र अलोकतान्त्रिक कदम हो,' विज्ञप्तिमा भनिएको छ ।
आन्दोलनले नागरिकताकै विषयमा सरकारले देखाइरहेको दोहोरो र नश्लभेदी मापदण्ड पनि निन्दनीय रहेको जनाएको छ । 'सिरोहियाको नागरिकतासम्बन्धी मुद्दा अदालतमा विचाराधीन रहेकोमा त्यससँग सम्बन्धित सबै तथ्यहरुका आधारमा उनको दोष रहेको वा नरहेकोबारे अदालतबाटै निरुपण हुनुपर्छ । तर यसबीच राज्यसत्तामा हुने व्यक्ति र दलहरुबाट परिचालित भइरहेको चौतर्फी विषाक्त र नश्लभेदी प्रचारबाजी र ट्रोलिङ आपत्तिजनक छ,' विज्ञप्तिमा छ, 'साथै नागरिकताकै विषयमा सरकारले देखाइरहेको दोहोरो र नश्लभेदी मापदण्ड पनि निन्दनीय छ ।'
गृहमन्त्री रवि लामिछानेले प्रमाण सार्वजनिक भइसकेको आर्थिक अपराधलाई विषयान्तर गर्ने र आफ्ना लागि निरपेक्ष दण्डहीनता सिर्जना गर्ने प्रयास गरेको भन्दै नागरिक आन्दोलनले चितवनले आपत्ति प्रकट गरेको छ । 'झनै आपत्तिजनक कुराचाहिँ गृहमन्त्री रवि लामिछानेले यस विषयमा विषाक्त र विभाजित जनमत सिर्जना गरेर आफूले गरेको, प्रमाण सार्वजनिक भइसकेको आर्थिक अपराधलाई विषयान्तर गर्ने र आफ्ना लागि निरपेक्ष दण्डहीनता सिर्जना गर्ने प्रयास गरेको देखिन्छ जुन कानुनी राज्यका लागि अस्वीकार्य कुरा हो,' विज्ञप्तिमा लेखिएको छ,'कुनै व्यक्ति निर्वाचित भएर मन्त्री हुँदैमा ऊ कानुनभन्दा माथि हुने हो अनि उसले देशको कुनै भुगोल वा समुदायका मानिसविरुद्ध सुनियोजित रुपमा नश्लभेदी जनमत सिर्जना गरेर सार्वजनिक स्वीकार्यता पाउने हो भने त्यसले हाम्रो समाज र देशलाई अन्धकार दिशामा डोर्याउने निश्चित छ ।'
नागरिक आन्दोलन चितवनले राज्यको कुनै पनि अंगले कुनै अपराधीलाई नच्यापी समान ढंगले न्याय प्रदान गर्न तथा विधिको शासन कायम गर्नसमेत माग गरेको छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)