कान्तिपुर वेबसाईट
AdvertisementAdvertisement
२१.१२°C काठमाडौं
काठमाडौंमा वायुको गुणस्तर: १५३

पर्सामा मिटरब्याजीविरुद्ध १ हजार ७५ निवेदन दर्ता

शंकर आचार्य

पर्सा — जिल्ला प्रशासन कार्यालय पर्सामा बिहीबारसम्म मिटरब्याजीविरुद्ध १ हजार ७५ निवेदन दर्ता भएका छन् । सहायक प्रमुख जिल्ला अधिकारी एवं जिल्ला प्रशासन कार्यालयका प्रवक्ता भीमकान्त पौडेलका अनुसार बिहीबार दिउँसो साढे दुई बजेसम्मको अवधिमा १ हजार ७५ मिटरब्याजपीडितले मिटरब्याजीविरुद्ध निवेदन दर्ता गरेका हुन् ।

पर्सामा मिटरब्याजीविरुद्ध १ हजार ७५ निवेदन दर्ता

‘मिटरब्याजीविरुद्धको निवेदन अनलाइन दर्ता भइरहेको छ,’ उनले भने, ‘वैशाख १७ देखि यसरी निवेदन दर्ता गर्न थालिएकोमा म्याद थप गरेर जेठ १४ सम्म निर्धारण गरिएको छ ।’ जिल्लाभरिका १४ वटै स्थानीय तहबाट मिटरब्याजीविरुद्ध निवेदन दर्ता भएको उनले बताए ।

विशेषगरी लेनदेन र जग्गा जमिनसम्बन्धी मिटरब्याजपीडितहरूको निवेदन दर्ता भएको छ । सबै निवेदन संकलन गरी मिटरब्याजको समस्या समाधान गर्न गठित आयोगमा पठाइने उनले बताए । हाल आयोगको केन्द्रीय कार्यालय मधेश प्रदेशको राजधानी जनकपुरमा रहेको छ । वित्तीय संस्था तथा सहकारीहरूविरुद्धको निवेदन हाललाई नलिइएको उनले बताए ।

गत वर्ष पनि यसरी जिल्लामा मिटरब्याजपीडितको उजुरी संकलन गरिएको थियो । जिल्ला प्रशासन कार्यालयमा ७ दर्जनभन्दा बढी उजुरी दर्ता भएको थियो । जिल्ला प्रशासन कार्यालयले ती उजुरीमाथि छानबिन गरी कारबाही प्रक्रिया अघि बढाउन जिल्ला प्रहरी कार्यालयमा निवेदन पठाएको थियो ।

प्रकाशित : जेष्ठ ११, २०८० १५:२४
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?