जनमतको अवरोधले मधेश प्रदेशसभा बैठक स्थगित

मंगलबार बसेको बैठकको प्रारम्भमै जनमत पार्टीका सांसदहरुले घटनाको उच्चस्तरीय छानबिन समिति गठन नभएपछि बैठक चल्न नदिने अडान राखेका थिए । जनमत पार्टीका प्रवक्ता एवं प्रदेश सांसद चन्दन सिंहले गत माघ ८ गते सप्तरीको राजविराजमा कृषि विश्वविद्यालयको शिलान्यास कार्यक्रममा आफ्ना दलका मन्त्री र सांसदमाथि सुनुयोजित तरिकाले आक्रमण गरिएको आरोप लगाए । पछि दलीय सहमति गरेर छानबिन समिति बनाउने भन्दै सभामुख रामचन्द्र मण्डलले बैठक चलाउन खोजेपछि जनमतका सांसदहरुले रोस्ट्रम घेराउ गर्दै नाराबाजी गर्न थाले ।

‘कृषि विश्वविद्यालयको शिलान्यास कार्यक्रममा जनमतका मन्त्री र सांसदहरुलाई मुख्यमन्त्रीकै उपस्थितिमा कुटपिट गरियो,’ जनमत पार्टीका प्रवक्ता सिंहले प्रदेशसभा बैठकमा भने, ‘त्यो घटनाको छानबिनका लागि सभामुखकै नेतृत्वमा छानबिन समिति गठन गर्ने दलीय सहमति भएको थियो । समिति किन गठन भएन ? नहुँदासम्म हामी बैठक चल्न दिँदैनौं ।’

सभामुख मण्डलले दलहरुको बैठक राखेर छानबिन समिति गठन गर्न पहल गर्ने आश्वासन दिए पनि जनमत पार्टीका सांसदहरुले रोस्ट्रम घेराउ गर्दै नाराबाजी गरेपछि प्रदेशसभाको बैठक स्थगित गरिएको हो ।