यादवले तोडे अनशन  

यादवलाई प्रमुख प्रशासकीय अधिकृत भूदेव झाले कार्यक्रमस्थलमै पुगेर कागजपत्र उपलब्ध गराएपछि आइतबार दिउँसो जुस पिएर अनशन तोडेका हुन् । नगरपालिका प्रमुख कन्थमणि जैसवालले अनियमितता गरेको र आफूले विभिन्न शीर्षकमा भएका खर्च, कामको सूचना माग्दा नदिएको भन्दै अनशनमा बसेको यादवले बताए । यद्यपि आफूले मागेको सूचना उपलब्ध भइसकेपछि अनशन तोडेको उनले सुनाए ।

शिक्षा क्षेत्रमा भएको खर्च र उपलब्धि, विद्युत्, इन्टरनेटमा भएको खर्च र उपलब्धि, कर्मचारी नियुक्ति, हाजिर रजिष्टर, तलब पेश्की विवरण, पदपूर्ति समितिको छनौट र प्रक्रिया, विकासका योजना भुक्तानीका विवरण, दर्ता चलानीको किताब र प्रतिलिपि, कोरोनापीडितलाई दिइएको रकम, नगरपालिकाको सम्पूर्ण बैंक खाताको विवरण, हालसम्म भएको खर्चको मासिक विवरणलगायत सार्वजनिक सुनवाइ हुनु पर्ने माग राखी यादव चैत ३ गते साँझदेखि अनशन बसेका हुन् ।

नगरपालिकाको विभिन्न शीर्षकमा भएका काम, कर्मचारीको नियुक्ति, खर्चलगायतको विवरण माग्दै यादवले आन्दोलनका क्रममा नगरप्रमुख जैसवालमाथि दुर्व्यवहार भएको भन्दै इलाका प्रहरी गरुडाले उनलाई केही समय नियन्त्रणमा लिएर छाडेको थियो । उनले स्थानीय सञ्चारकर्मीलाई समेत तथानाम गालीगलौच गरेपछि पत्रकार महासंघ रौतहट शाखाले विज्ञप्तिसमेत निकालेर भर्त्सना गरेको थियो । त्यसपछि उनले सञ्चारकर्मीसामु माफी मागेका थिए ।

नगरप्रमुख जैसवालले आफूले कुनै पनि अनियमितता नगरेको दाबी गरे । ‘मैले बेथिति हटाउने कामको सुरुआत गरेका हुँ । तर मलाई काममा सहयोग गर्नुको साटो अपमान गर्ने काम भयो,’ उनले भने, ‘यादवले मागेको सबै सूचना दिन्छु भन्दा पनि समय नपाउने कस्तो जिद्दी हो । हामीले सबै सूचना दिन्छौ भनेकै हो । अनशन बसेर सबैलाई चकित पारे ।’ यादवले आफूलाई दुर्ववहार गरेको भन्दै इलाका प्रहरी गरुडामा निवेदनसमेत दिएका थिए । तर, ईलाकाका डीएसपी छेदीलाल कामतीले नगर प्रमुख जैसवालको निवेदन दर्ता गरेनन् ।

यता बृन्दावन नगरपालिकामा व्यापक आर्थिक अनियमितता भएको भन्दै वडाध्यक्ष र दलका नेताहरुको रिले अनशन जारी छ । नगरपालिका प्रमुख विनोद कुर्मीले गरेको गतिविधिबारे सूचना माग्दा नदिएको आरोप लगाउँदै वडा नम्बर २ का वडाध्यक्ष सिकिन्द्र राउत कुर्मी, ३ का वडाध्यक्ष हरिनारायण साह, ४ का वडाध्यक्ष श्यामनन्दन राय र ५ का वडाध्यक्ष फेकु दास रिले अनशनमा बसेका हुन् । उनीहरुसँगै नगरपालिकाका पूर्वनगरप्रमुख, एमाले, माओवादी केन्द्र, कांग्रेस, जसपा र आम जनता पार्टीका केन्द्र, प्रदेश र जिल्ला तहका नेताहरु यही बुधबारदेखि अनशनमा छन् ।