पुल बनाउन सडक अवरुद्ध
जनकपुर — वैकल्पिक बाटोको व्यवस्था नगरी जनकपुर आउने मुख्य तीनवटा सडक अवरुद्ध पारेर पुल बनाउन थालेपछि पूर्वी धनुषावासीले सास्ती भोग्नुपरेको छ । जनकपुर–खरिहानी–सिमराढी सडक र जनकपुर–तिनकौरिया–यदुकुहा सडकमा रहेका दुवै पुरानो पुल बनाउन थालिएको हो ।
पूर्वी धनुषालाई जनकपुर जोड्ने यी मुख्य सडक हुन् । यस्तै, जनकपुर–कपिलेश्वर सडक खण्डमा नाला निर्माण भइरहेकाले एक सातादेखि तीनवटै सडक अवरुद्ध छन् ।
अहिले पूर्वी धनुषावासी जनकपुर रेल्वेभन्दा दक्षिणमा निर्मित नयाँ पुल हुँदै जनकपुर आउने गरेका छन् । तर, पूलभन्दा पूर्वको सडक साँघुरो र कच्ची छ । एउटै बाटोबाट बस, ट्रक, टिपर, इरिक्सा, मोटरसाइकल, साइकल चल्नुपर्दा बिहान–बेलुका घण्टौं जाम लाग्छ । धुलो र ठूला गाडीको हर्नले स्थानीय हैरान छन् । ‘पुल निर्माण हुन महिनौं लाग्छ । वैकल्पिक बाटो निर्माण गरेर मात्र पुल भत्काउनुपर्थ्यो,’ जनकपुर–१ पुल्चोकका साइकल व्यवसायी भरत साहले भने ।
बाटो अवरुद्ध भएयता पुल्चोक सुनसान भएको छ । जनकपुर–खरिहानी–सिमराढी र जनकपुर–तिनकौरिया–यदुकुहा सडक हुँदै पूर्वी धनुषावासीलाई मात्र होइन, मध्य धनुषा र सिरहासम्मका सर्वसाधारण जनकपुर आउजाउ गर्छन् । धान, गहुँ, तरकारीलगायत कृषि उत्पादन जनकपुर बजारसम्म ल्याउने तथा ग्रामीण क्षेत्रका पसलका लागि मालसामान आपूर्ति गर्ने सडक पनि यही हो । अहिले यिनै सडक ठप्प हुँदा ग्रामीण क्षेत्रका किसान तथा व्यवसायी पनि मर्कामा छन् ।
जलाद नदीको दुवै जीर्ण र पुरानो पुल भत्काएर नयाँ निर्माण गर्नुपर्ने माग पहिलेदेखि नै थियो । चालु आर्थिक वर्षमा दुवै पुल निर्माणका लागि ६/६ करोडका दरले १२ करोड रुपैयाँमा ठेक्का लागेको छ । सुगम निर्माण सेवाले जिम्मा लिएको दुवै पुल निर्माण आगामी असारसम्म सक्नुपर्ने सम्झौता छ । तर, पुल निर्माण र निर्माण कम्पनीबारे स्थानीय बेखबर छन् । निर्माण लागत, सम्झौता र सम्पन्न हुने मिति उल्लेखित बोर्ड जडान निर्माणस्थलमा राखिएको छैन । जनकपुरको कदम चोकस्थित ऋषि फर्निचरका सञ्चालक विजयकुमार साहले भने, ‘पुलको लागत इस्टिमेट र डिजाइन उल्लेखित बोर्ड राख्नुपर्ने प्रावधान भए पनि निर्माण कम्पनीले यसलाई वास्ता गरेका छैनन् ।’
हुलाकी सडक आयोजनाका डिभिजनल इन्जिनियर कृष्णदेव महतोले लागत इस्टिमेट विवरणसहितको बोर्ड यथाशीघ्र राखिने बताए । डिई महतोका अनुसार पुल भत्काउनुअघि जिल्ला प्रशासन कार्यालयमा सर्वपक्षीय बैठक बसेको थियो । बैठकको निर्णयअनुसार असार मसान्तसम्म निर्माण सम्पन्न गर्ने उद्देश्यले पुल एकै पटक भत्काइएको हो । ‘दसैं, तिहार, निर्वाचनका कारण पुल निर्माण सुरु गर्न ढिलो भयो । आर्थिक वर्षभित्र काम सकिने उदेश्यले दुवै पुल एकैपटक भत्काइएको हो,’ महतोले भने ।
दुवै निर्माणस्थलमा खाली जग्गा नभएकाले वैकल्पिक मार्ग बनाउन कठिन भएको उनको भनाइ छ । तर, सर्वपक्षीय बैठकमा ठूला सवारीसाधन नगर बाहिरका मुजेलिया र लोहना सडकबाट चलाउनुपर्ने सहमति भएको छ । स्थानीयको दबाबमा बिहीबार पुल चोकमा वैकल्पिक बाँसको लचका (अस्थायी पुल) निर्माण गरिए पनि यसबाट नदी तर्नु जोखिमपूर्ण छ ।
प्रकाशित : चैत्र ११, २०७९ ०९:०३
