नाकामै थन्किए नयाँ सवारीसाधन
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
पर्सा — आयातकर्ताले जाँचपास गरेर नलैजाँदा वीरगन्ज भन्सार नाकामा ठूलो संख्यामा नयाँ सवारीसाधन थन्किएका छन् । वीरगन्जस्थित एकीकृत सुरक्षा जाँच चौकी परिसर (आईसीपी) मा जिप, कार, भ्यान र बस तथा ट्रकका चेसिस गरी २ हजार १३ नयाँ सवारीसाधन छन् । तीमध्ये ६ सय २० नयाँ जिप, कार, भ्यान हुन् भने १ हजार ३ सय ९३ बस/ट्रकका चेसिस छन् ।
![](https://assets-cdn.ekantipur.com/uploads/source/ads/900x100-1172024092759.gif)
![नाकामै थन्किए नयाँ सवारीसाधन](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2022/miscellaneous/icp-birgunj-ma-naya-sawari-sadhan-1-03122022092740-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
आयातकर्ताले थन्किएका सवारीसाधन चोभार सुक्खा बन्दरगाहमा लगेर राख्न पाउनुपर्ने माग गरिरहँदा आईसीपी परिसरमा भने अब नयाँ सवारीसाधन राख्ने स्थानको अभाव हुन थालेको छ । आईसीपी सञ्चालक इन्टरमोडल यातायात विकास समितिका अपरेसन इन्जार्च जितेन्द्र रसाइलीले आयातकर्ताले बस तथा ट्रकका चेसिस र जिप, कार फाट्टफुट्ट छुटाएर लग्ने गरेको बताए । तर, जाँचपास गराउने भन्दा नयाँ सवारीसाधन भित्रिने दर बढी रहेकाले आईसीपी परिसरमा सवारीसाधनको संख्या घट्न सकेको छैन ।
‘गत आइतबार मात्रै भारतीय दूतावासले २८ वटा एम्बुलेन्स भित्र्याएको छ,’ उनले भने, ‘अन्य आयातकर्ताले पनि नयाँ सवारीसाधन आयात गर्ने क्रम जारी छ, केही दिन बिराएर यस्ता सवारी जाँचपास पनि भइरहेकै छन्, तर त्यो संख्या पर्याप्त छैन ।’ वीरगन्ज भन्सार कार्यालयका सूचना अधिकृत दिल्ली सुवेदीले भन्सारमा अड्किएका सवारीसाधनको निकासको सम्बन्धमा मंगलबार सरोकारवालासँग राखिएको बैठक पनि निष्कर्षविहीन भएको बताए । कार्यालयले इन्टरमोडलसँगको समन्वयमा यो नाकाबाट सवारीसाधन आयात गर्ने मुख्य आयातकर्ता सिप्रदी, लक्ष्मी क्लियरिङ, टोयोटा, आइएमई मोटर्सलगायत कम्पनीका प्रतिनिधिसँग छलफल गरेको थियो ।
रसाइलीका अनुसार बस र ट्रकका चेसिसको प्रमुख आयातकर्ता सिप्रदी ट्रेडिङ हो । उक्त कम्पनीले मात्रै यहाँ आयात हुने कुल चेसिसको झन्डै ७० प्रतिशत आयात गर्छ । त्यसपछि क्रमशः आईएमई मोटर्स, ओम्नी मोटर्स हुन् । आईएमई मोटर्सले अशोक लेल्यान्ड र ओम्नी मोटर्सले भारत बेन्ज ब्रान्डका चेसिस आयात गर्छन् । थोरै चेसिस दुगड समूहले पनि आयात गर्छ । त्यसैगरी, जिप, कार, भ्यानको प्रमुख आयातकर्ता युनाइटेड ट्रेड सिन्डिकेट प्रालि, अग्नि इनकर्पोरेट प्रालि र लक्ष्मी इन्टरकन्टिनेन्टल हुन् । वीरगन्ज भन्सारका प्रवक्ता रामचन्द्र ढकालले बैंक तथा वित्तीय संस्थाहरूले लगानी नगर्दा तथा ब्याज दर नघट्दासम्म नयाँ सवारीसाधन जाँचपास सुस्त नै रहने बताए ।
![](https://assets-cdn.ekantipur.com/uploads/source/ads/900-x-100-0172024023126.gif)