पप्पुको बैंक ग्यारेन्टी जफत

शिव पुरी

रौतहट — ठेक्का रद्द भए पनि गौर नगरपालिका–४ स्थित टिकुलिया नदीमा पुल बलजफ्ती निर्माण थालेको पप्पु कन्स्ट्रक्सनले कामदार फिर्ता लगेको छ । कामदार फर्किएपछि पुलको काम रोकिएको छ । पुल बनाउन पप्पुले उच्च अदालत वीरगन्जमा मागेको अन्तरिम आदेश खारेज भएपछि सडक कार्यालयले पप्पुको बैंक ग्यारेन्टी जफत गरेको छ ।

पप्पुको बैंक ग्यारेन्टी जफत

टिकुलिया घाटमा पुल निर्माणको ठेक्का लिएको पप्पु कन्स्ट्रक्सनले ३ वर्षभित्र निर्माण काम पूरा गर्ने ०७१ असार २९ मा सम्झौता गरेको थियो । निर्माणको काम बीचैमा छाडेर पप्पु सम्पर्कविहीन भए । काम अलपत्र परेपछि सडक डिभिजन कार्यालय रौतहटले पटक–पटक पत्र पठाएर काम थाल्न अनुरोध गरे पनि कुनै सुनवाई नगरेपछि सडक कार्यालयले ठेक्काको म्याद थप गरेन् ।

ठेकेदारले सम्झौताअनुसार काम नगरेको, लिखित, मौखिक ताकेता गर्दा बेवास्ता गरेकाले सम्झौताको सर्त विपरित गएको भन्दै जेठ १० गते ठेक्का रद्द गर्‍यो । त्यसपछि ठेक्का रद्दका लागि अन्तरिम आदेश जारी गराउन पप्पुले उच्च अदालत वीरगन्जमा मुद्दा दायर गर्‍यो । अदालतले ठेक्का रद्दको प्रक्रिया यथावत राख्न भन्दै अन्तरिम आदेश दियो । त्यही आदेश टेकेर पप्पु फेरि पुलको निर्माण थाल्यो ।

सडक डिभिजन कार्यालय चन्द्रनिगाहपुरका प्रमुख दरोगाप्रसाद साहले अदालतले ठेकेदार कम्पनी पप्पु कन्स्ट्रक्सनले दिएको मुद्दाको अन्तरिम आदेश खारेज गरेकाले अब नयाँ ठेक्काको लागि बाटो खुलेको बताए । ‘ठेकेदारले ठेक्का सकार गर्नेबेला राखेको बैंक ग्यारेन्टीसमेत जफत गरिसकेका छौं,’ साहले भने ।

अदालतमा मुद्दा चल्दै गर्दा सडक कार्यालयलाई खबरै नगरी एकलौटीढंगले पप्पुले साइडमा काम गर्दै आएको थियो । अहिले उसले काम बन्द गरेको छ । साइडमा पप्पुले राखेको डन्डी र मेसिन त्यतिकै अलपत्र छ । साइड सुनसान छ । तत्कालिन सडक डिभिजन कार्यालय हेटौंडाबाट २० करोड ७२ लाखको लागतमा लालबकैया नदीमा २२५ मिटर लम्बाइ र ७.२ मिटर चौडाइ भएको पक्की पुल बनाउन बोलपत्र आव्हान गरेको थियो । पप्पुले उसैबेला १४ करोड ९३ लाखमा टेन्डर सकार गरेको थियो ।

ठेकेदारले बिनाकारण बीचमै काम छाडेर गएपछि पुल अलपत्र छ । ठेक्काको सम्झौता ०७४ असार २५ मा सकिएको थियो । ठेकेदार कम्पनीका प्राविधिक जमुना यादवले अदालतको आदेशकै भरमा काम गरेको बताउँदै आएका थिए ।

प्रकाशित : माघ २६, २०७९ ११:०३
प्रतिक्रिया
पठाउनुहोस्
जनताको राय

८ देशका लागि सिफारिस भएका राजदूतको नाम कस्तो लाग्यो ?

x