बाती बनाउने प्रतियोगिताका पाँच मिनेट
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
ताप्लेजुङ — फुङलिङ नगरपालिका-११ फुरुम्वूकी सुकमाया फुरुम्वू धुपको धुलो लगाएर बाती बनाइ रहन्थिन् । आफूले बनाएको धुप बिक्री पनि गर्छिन् । तर यही विधाको प्रतियोगितामा भने उनी अहिलेसम्म सहभागी भएकी थिइनन् ।
![](https://assets-cdn.ekantipur.com/uploads/source/ads/900x100-1172024092759.gif)
![बाती बनाउने प्रतियोगिताका पाँच मिनेट](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/miscellaneous/img6828-1852024101036-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
ताप्लेजुङ पर्यटन महोत्सवमा घरेलु तथा साना उद्योग महासंघले यो विधाको प्रतियोगिताको आयोजना गरेपछि उनीपनि सहभागी भइन् । धुप, त्यसलाई बेर्न प्रयोग गरिने सामग्री बोकेरै गएकी उनले आफ्नो सामानको उपयोग गर्न भने पाइनन् । आयोजकले दिएको सामान राखेर प्रतिष्पर्धा गर्नुपर्यो ।
यसरीनै गएकी थिइन् फुङलिङ नगरपालिका-४ की कृष्णमाया कार्कीपनि । सुनपाती, भैरुङपाती, त्यसलाई लुकाउने हाते कागजको पत्ता लिएर गएकी उनले घरमा भने सहज ढंगले आफ्नो अनुकुलता अनुसार बनाउने गरेकी थिइन् । कार्यक्रमका संयोजक अञ्जना कडरियाले जम्मा पाँच मिनेटको समय हुने र त्यो अवधिमा जसले राम्रो र धेरै बनाउँछ, त्यही प्रथम हुने सुनाएपछि उनले प्रतिष्पर्धीतर्फ पल्याक पुलुक हेरिन् ।
मनमा डरपनि भयो र जित्छुहोला भन्ने हिम्मत पनि आयो । तीन जना निर्णायक मण्डलको नाम सार्वजनिक गरेर सिटी बजाएपछि सुरु हुने प्रतियोगितामा चनाखो भएर प्रतिष्पर्धा गर्न उद्धघोषक कडरियाले आग्रह गरेपछि आफूलाई सहज हुनेगरी पलेटी कसेर बसिन् र प्रतिष्पर्धाका लागि तयार भइन् ।
पाँच मिनेटको अवधिमा सुकमायाले १० वटा बाती कातिन् । ११ वटा पुर्याउने क्रममा बटार्दा-बटार्दै निर्णायक सुमित्रा प्रसाईले सिटी बजाएपछि बन्दै गरेको बाती हातैमा राखिन् । निर्णायक मण्डलकी बालकुमारी न्यौपानेले पूरा नभएको बाती प्रतियोगितामा समावेश नहुने जानकारी गराएपछि फालिदिइन् ।
तर पनि प्रतियोगितामा प्रथम भइन् र नगद ५ हजार जितिन् । कृष्णमायाले ८ वटा बनाएर द्वितीय भइन् र तीन हजार हात पारिन् । १७ जना महिलाको सहभागिता रहेको प्रतियोगितामा प्रथम हुनेले १० वटा बनाउँदा अन्तिम हुनेले दुई वटा बनाएका थिए ।
सदरमुकाम फुङलिङमा पर्यटन महोत्सव चलिरहँदा महासंघले राखेको एउटा विधा धुप बाती बनाउने प्रतियोगिता थियो । अहिले यसको राम्रो बजार भएको र घरमै बसेर उद्यमी बन्न सकिने भएकाले यसलाई प्रोत्साहित गर्न प्रतियोगिता आयोजना गरिएको संयोजक कडरिया बताउँछिन् ।
पाथीभरा दर्शनका लागि वार्षिक तीन लाखको हाराहारीमा आउने तीर्थयात्रीले यसको उपयोग गर्ने बुझाइ उद्यमीको छ ।यसका लागि अर्गेली, लोक्ताबाट तयार पारिएको एकै साइजका कागजका टुक्राहरु बनाइन्छ । त्यसलाई भुँइमा राखिन्छ । त्यसको भित्र लगाउन सुनपाती, भैरुङपाती, धुप र कपुरको धुलो मिसाएर अगाडि राखिन्छ ।
त्यो कागजमा धुलो राखेपछि त्यसलाई झर्न नदिने गरी पट्याएर बेरिन्छ । बेरिसकेपछि यसलाई बाती भनिन्छ । घर तथा मन्दिरमा अधिक प्रयोग हुने यो बाल्दा मगमग गन्ध आउने गरेको छ । यसको बजार मूल्य प्रतिगोटा दुई रुपैयाँ रहेको ब्यवसायी बताउँछन् ।
‘प्रतियोगिताका लागि समय त ठिकै राखेको होला । तर दुई मिनेटजति आत्तिएरै जाँदो रहेछ,’ सात वटा बनेर तेश्रो भएकी राधिका खवासले भनिन्, ‘१० मिनेट राखेको भएचाँहि आत्तिने समय कटाएरपनि राम्रै प्रतिष्पर्धा हुन्थ्यो ।’ अब घरमा नियमित बन्ने र बिक्री गर्ने योजना खवासको छ ।
![](https://assets-cdn.ekantipur.com/uploads/source/ads/900-x-100-0172024023126.gif)