स्थापनाको चार दशकपछि इनरुवा अस्पतालमा ब्लड बैंक

इनरुवा नगरपालिका र भोक्राहा गाउँपालिकाको आर्थिक तथा नेपाल रेडक्रस सोसाइटी सुनसरीको सहयोगमा अस्पताल परिसरमा रक्त सञ्चार केन्द्र स्थापना गरी सञ्चालनमा ल्याइएको हो । केन्द्र सञ्चालननमा आएसँगै सुनसरी सदरमुकाम इनरुवासहित कोशी, हरिनगर, गढी, रामधुनी र भोक्राहा गाउँपालिकाका सेवाग्राहीलाई फाइदा पुग्ने अस्पतालले बताएको छ ।

केन्द्र स्थापनासँगै विभिन्न स्थानीय तहबाट उपचारका लागि आउने बिरामीलाई रगतकै अभावमा धरान या विराटनगरको अस्पताल रेफर गर्नुपर्ने बाध्यता हटेको मेडिकल सुपरिटेन्ट डा. देवराज घिमिरेले बताए । उनका अनुसार अब अस्पतालमा उपचाररत बिरामीहरुलाई सहुलियत दरमा रगत उपलब्ध गराइनेछ ।

दैनिक ४ सय बिरामी उपचारका लागि आउने गरेको इनरुवा अस्पतालले तीन महिनाअघि आँखा उपचार सेवासमेत सुरु गरेको थियो ।