१९.१२°C काठमाडौं
काठमाडौंमा वायुको गुणस्तर: १७०

उठिबास हुने डरले आन्दोलित

चन्द्र कार्की

तेह्रथुम — पुष्पलाल (मध्य पहाडी) लोकमार्ग विस्तार गर्दा उठिबास हुने भन्दै वसन्तपुर बजारका बासिन्दाले गत बिहीबार प्रदर्शन गरेका छन् । 

बीच बजारबाट लोकमार्ग निर्माण हुँदा बसोबासस्थलमा क्षति पुग्ने बजारवासीको भनाइ छ । उनीहरूले लोकमार्ग अन्यत्रबाट लैजान माग गरिरहेका छन् । पाँचथरको चियोभन्ज्याङदेखि बैतडीको झुलाघाट जोड्ने पहाडैपहाड भएर निर्माण भइरहेको राष्ट्रिय गौरवको आयोजना उक्त लोकमार्ग म्याङलुङ हुँदै वसन्तपुर बजारसम्म आइपुगेको छ । यो लोकमार्ग बन्दा मुख्य चोकको घर भत्काउनुपर्ने र धेरै नोक्सान हुने भएकाले विरोधमा उत्रिएको स्थानीय चूडामणि अधिकारीले बताए ।

स्थानीयका अनुसार बजार क्षेत्रका सय बढी घरको अगाडिको भाग फुटाल्नुपर्ने हुन्छ । लोकमार्ग विस्तार गर्दा बजार क्षेत्रका घरमा क्षति नपुर्‍याई विस्तार गर्नुपर्ने वा हाल कायम रहेको सडकलाई नै प्रयोगमा ल्याउनुपर्ने माग रहेको उद्योग वाणिज्य संघ उपशाखाका अध्यक्षसमेत रहेको स्थानीय रोशन सुवेदीले बताए । मध्य पहाडी लोकमार्ग योजना कार्यालय पाँचथरले भने यसअघि नै सम्बन्धित क्षेत्रका प्रभावित बासिन्दा र जनप्रतिनिधिसँग पटकपटक छलफल गरेर काम अघि बढाएको जनाएको छ । योजना प्रमुख अर्जुनकुमार बमले बजार क्षेत्रको छोटो दूरीमा मात्र केही घरमा न्यून क्षति पुग्ने हुनाले त्यसका लागि मुआब्जाको व्यवस्था पनि गरिएको बताए । उनका अनुसार बजार क्षेत्रमा ११ देखि १२ मिटरको चौडा सडक हुनेछ ।

बजार क्षेत्रका अधिकांश सडक ९ देखि १० मिटरसम्मको रहेको र थोरै मात्र सडक विस्तार गर्दा हालका लागि पुग्ने बमले बताए । स्थानीयको मागअनुसार लोकमार्ग अन्यत्रबाट लैजान सम्भव नहुने र बीच बजारबाटै लगिने उनले प्रस्ट्याए ।

सरकारले पहाडबाट तराई र सुविधासम्पन्न स्थानमा हुने बसाइँसराइ रोक्ने उद्देश्यले घोषणा गरेको नयाँ सहरसमेत हो वसन्तपुर । यहाँनयाँ सहर आयोजना कार्यालय स्थापना भएर पूर्वाधार निर्माणसमेत भइरहेको छ । लोकमार्ग योजना कार्यालयले बजार र सडक चौडा हुने स्थानको प्रारम्भिक वातावरणीय अध्ययनका लागि फिल्ड सर्भेको कामसमेत थालेको छ । उसले त्यसका लागि छिन्नमस्ता मल्टी इन्जिनियरिङ सोलुसन प्रालिसँग सम्झौता गरेको छ ।

प्रकाशित : माघ २, २०७९ ०८:०८
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?