बोलेर मात्र भएन, गरेर देखाऊ

नेताहरूका कारण जनतामा निराशा छाएको छ । नेताहरू एकले अर्कालाई आरोप लगाउँछन् । संसद् बन्द गर्छन् । संसद् बन्द गरेपछि छलफलचाहिँ कहाँ गर्ने ? एमाले सरकारमा छँदा कांग्रेसले संसद् बन्द गर्ने, कांग्रेस सरकारमा छँदा एमालेले बन्द गर्ने ! तलब मजाले खाने अनि संसद् बन्द गर्ने तरिका ठीक भएन । सरकारले प्रतिपक्षीको आवाज सुन्नु पर्दैन ?

यति वर्ष उति वर्ष जेल बसें भनेर मात्र भएन । त्यहीअनुसार काम गर्नुपर्‍यो । हिजो जेल बसेको ब्याज खाएर बस्ने कि जनताका लागि केही गर्ने ? जनता सिटामोल खान नपाएर मर्नु परिरहेको छ । एक गाग्री पानी लिन दिनभरि हिँड्नुपरेको छ । यसतर्फ नेताको नजर किन जाँदैन ? ससाना काम गरेर देखाउँदा नै जनता खुसी हुनेछन् । थोरै खुसीमा रमाउन सक्ने क्षमता नेपालीमा छ ।
– पुरुषोत्तम घिमिरे, जोरपाटी, काठमाडौं